Күч-көлснә болн дәәнә ветеранмудын клуб бииһин хөрн зурһадгч сезоһан секв

«Нам годы не помеха» нертә күч-көлснә болн дәәнә ветеранмудын клуб бииһин хөрн зурһадгч сезоһан секв. Ода клубын ханьд зу һар медәт оржана. Һардач Елизавета Болдыреван келсәр, эн кем май сар күртл болх.

Бииһин кружокд ирсн әмтн оньдин инәмскләд, шогта-наадта бәәнә. Эдн цугтан жир һарсн әмтн. Евдокия Бадма-Горяева ода ачта амрлһнд бәәнә. Урднь баһ дүүвр наснадан столовд көдлж йовла. Ода бииһин кружокд кесг жилдән оржана. Энд йир таасгдна гиж эн келнә.

Елизавета Болдырева болхла насни туршарт искусствин халхар көдлж йовла. Ода зурһан жилдән ветеранмудын бииһин кружок һарджана. Пенсьт һарсн бийнь ода күртл чанһ-чиирг заглюн. Хара суудго күүк күн ода бииһин кружок һарджана. Энүнә һардврт сард нег дәкж медәтнр би биилдг дасжана.

Ода кружокд урднь багш, тосхач, эмч болж көдлж йовсн улс оржана. Эднә тоолврар, сард нег дәкж хамдан цуглрад биилхлә йир байрта болна. Энд медәтнр хоорндан нәәж болад, нег-негән дөннж күндлнә. Давсн зун жилин жирдгч жилмүдт биилж йовсн бииһән сергәхлә, седкл бахмжаһр дүүрнә.

Элст балһсна ээж-аавнр бийдән дурта эрдм олж авад, сул цаган сергмжтәһәр давулжана гиж келж болхмн. Октябрин нег шинд болхла, медәтнрин сән өдрлә эдн олн әмтнд билг-эрдмән тусхаж, концертд орлцхмн.

Ээнән Делгр, Котина Валерий