Комсомольский селәнд бичкдүдин үүдәлтин бәәшнг ясврин хөөн секгдв
Хар Һазра района цутхлнг селәнд бичкдүдин үүдәлтин гер капитальн ясврин хөөн байрин бәәдлд секгдв. Ода селәнә бичкдүд дурта эрдмәрн сул цагтан нааран ирәд көдлж чадхмн. Района улсин байриг Хальмг танһчин толһач Алексей Орлов бас хувалцв.
Комсомольский селәнә бичкдүдин үүдәлтин района герт кесг жилдән ясврин көдлмш күләжәсмн. Ода болхла энүг ахр болзгт капитальн кевәр шинрүлж ясв. Давсн зун жилин тәвдгч жилмүдт бәргдсн гер зурһан сарин эргцд таньгдшго кеәвр сәәхрв. Хар һазра района билгтнр үүдәлтин бәәшниг шин герт нүүж орв гиж келж болх. Энүнд Хальмг танһчин толһач Алексей Орлов герч болв. Байрт орлцсн ахлач бәәшнгин цуг хорас эргәд хәләв. Энд хореографин, уйн наста туристнрин хорас бәәнә, әәмшг уга бәәлһнә школ көдлжәнә, театр болн кинон студь чигнс екх арһ учрв. Хальмгин толһач Алексей Орловин келсәр, иим сән белг авсн бичкдүдлә хамдан байрлх кергтә. Хамгин түрүнд энд көвүд-күүкд билг-эрдмән делгрүләд, сул цаган олз-тустаһар давулх. Нег үлү, селәнә әмтнә таал ясржана. Багшнр чигн көдлх, эк-эцкнрт сул цаг һарх.
Үүдәлтин герин ясвриг Каспийск сурвлжна консорциумла кесн буйнч седклин бооцаһар күцәв. Ут-тоодан тосхлтын көдлмшт хөрн сай арслнг һарв. Нефтяникүдин мөнгәр герин ора шинрүлгдв, электрокүчнә сунһуг сольгдв, усна сурвлжн татгдв, дула өгдг автономн систем бәәнә. КТК-Р ниицәнә элч Александр Благовин келсәр, энд эрдмән делгрүлх бичкдүдт таал таасгдхла эннь хамгин ик ачлвр болх. Иим социальн төсв Хальмг танһчд дәкәд чигн күцәгдх. Хамцу нөкцлтин көдлмш цаарандан чигн кегдхмн гиж Благов иткүлв. КТК-Р ниицәнә генеральн директорин дарук Александр Благовин келсәр, Ик Буурла районд шин школ бәрх зура бәәнә. Турва тәвсн һазрт талдан чигн тосхлт кегдхмн. Эн туст темдглсн программ күцәсн деерән, танһчин улсин сурврмуд ханһаж цуг кергтә төсв бас кегдх.
Эн өдр Хар Һазра районә әмтнд хойр дам байр болв. Давсн бембә өдр района әмтн эврәннь селәнә эдл-ахун көдләчнрин сән өдр темдглв. Эднә төлә байрин концерт үзүлгдв. Алексей Орлов селәнә цуг улсиг халунар йөрәһәд, Хар Һазр Хальмгин агропромышленн халхин ик чинртә нег әнгнь болх гиж темгдлв. Хальмг танһчин толһач Алексей Орловин келсәр, Хар Һазра районд мал өсклһнә программар бод мал борддг плошадкс тосхгдх. Удл уга иим көдлмш энд эклх. Юнгад гихлә, энд усна көрнг бәәнә, цувгуд бас дөн күргх. Селәнә эдл-ахун предприятьмудын үзүлжәх күцәмж Хар һазра район сән делгрлт авчана гисн герч болжана.
Байрин эцүст Алексей Орлов келн-улсин хотнд одв. Энүг Комсомольский селәнә цутхлнг талвнгд бәрсн бәәж. Района селәнә эдл-ахун предприятьмуд эврәннь күцәмжән үзүлв, гиичнриг тогтсн авьясар халун жомбаһар болн боорцгар тоов.
Бевина Мергн, Хулхачин Николай
