Йиртмжин көрнгин министерств райодт рейдмуд күцәжәнә
Хальмг танһчин йиртмжин көрнгин болн эргднк аһу харлсһна министерств йиртмж харслһна рейдмуд күцәжәнә. Иим керг-үүлдврмүд танһчин зәрм райодт кегдв. Энүнә ашт илтскн дуту-дунсдин болн зака эвдсн йовдлмудын туск материалмуд, тер тоод эс темдглсн һазрт хог-бог асхдг йовдлмудын туск зәнг райодын административн комиссьмүдт йовулгдв. Давсн долан хонгт танһчин йртмжин министерств министр Николай Очировин һардврта Яшкульск районд одв.
Танһчин йиртмж харлһна министерствин то-дигәчр Яшкуль селән Хальмг танһчин селәд-поселкс дунд хамгин цевр-цер гиж тоолгдна. Селәнә һардачнр болн бәәрн әмтн селнә аһу кеерүл-сәәхрүлһнә төрт онц оньг тусхажана. Сүл жилмүдт района админи страц болн бәәрн улс селәнә уульнцд болн хаалһст цевр-цер бәәлһнә төлә ик көдлмш кесмн. Болв Яшкульск района администрацин толһач Тельман Хаглышевин келсәр, тер бийнь эн туст хаһлх төрмүд дала, селәнә әмтн энд-тенд хог-бог асхад, эргднк аһу бурздажана.
Яшкульск района администрацин толһач Тельман Хаглышевин келсәр, района цутхлнг Яшкуль селәнд хог-бог асдг һазрин төр хамгин хурц төрт хүврв. Иим бәәдл чиклхин төлә ирлцнһү керг-үүлдвр күцәгджәнә. Хог-бог асхдг һазр хашалгджана. Хог-бог бәәрн әмтн асхна, Талда улс ирж һазр бузрдажахш. Бидн эврән гемтәвидн. Эн туст көдлмш кегджәнә. Иргч намрар энүнә ашнь ил үзгдх.
Танһчин йиртмжин министрин болн района толһач Тельман Хаглышевин хоорнд болсн күүндврин йовудт санитарн болн йитртмж харлһна үүлдврин, селәд-поселкст зөвшәл угаһар энд-тенд хог-бог асхдг төрмүдин, гидротехническ сооруженьсин бәәдлин болн талдан чигн төрмүдин тускар тодрха күүндвр кегдв. Йиртмжин көрнгин министр Николай Очировин тоолврар, дор ормднь одад, цуг төрмүдиг эврәннь нүдәрн үзж, хаһлх төрмүдиг цаглань хаһлхла сән болна.
Хальмг танһчин йиртмжин көрнгин болн эргднк аһу харслһна министр Николай Очировин келсәр, талдан райодла дүнцүлхлә, эн халхар Яшкульд бәәдл гем уга сән. Тер бийнь дуту-дундс бәәнә. Эн халхар һардачнр көдлмш кежәнә. Апрель сард цуг дуту-дундс чиклх зөвтә.
Өдгә цагт зөв угаһар эс темдглсн һазрт хог-бог асхдг йовдлмудла ноолда келһнд хог-бог эд-бод кедг прдеприять уга болад, боомтг болжана. Министр Николай Очировин келсәр, мана танһчд инвестормудын дөнгәр хог-бог эд-бод кедг заводмуд удл уга тосхгдх зөвтә.
Хальмг танһчин йиртмжин көрнгин болн эргднк аһу харслһна министр Николай Очировин келсәр, танһчин толһач Алексйе Орлов экологин төрт онц оньг тусхажана. Эн туст неквр чанһрх гиж санжана. Йиртмж харслһна халхар кех көдлмш дала. Әмтн хог-бог асхдг му авьясан хайхла бәәдл чикрх.
Селәд-поселксин болн балһсдын уульнцс цевр-цер кевәр бәрхин төләд дала мөнгн керг уга. Цевр уульнцс болн эргднк аһу цевр-цер болхла, мана эрүл-мендин халхд эннь сән нилчән күргх. Тер мет цевр уульнцс, ке-сәәхн цецгүд болн урһа модн әмтнә седкл байрулсн деерән, бат иргчин тускар сән уха орулна.
Бевина Мергн, Ирчин Алексей
