Йиртмжин көрнгин министерств эргндк аһу харлһна төлә бүртклһ кежәнә
Хальмг танһчин йиртмжин көрнгин болн эргндк аһун министерств танһчин райодт йиртмж харлһна рейдмуд күцәжәнә. Иим керг-үүлдврмүд Баһ Дөрвдә, Сарпинск, Целинн болн Ик-Буурла райодт болв. Энүн йовудт илткгдсн дуту-дундсин тускар, тер тоод зөв угаһар хог-бог асхсн һазрин тускар райодын административн комиссмүдт йовулгдх. Йиртмжин министерствин специалистнр Приютненск районд иим рейд кев.
Мана танһчин селәд дундас Приютное хамгин цевр-цер селәнә негнь болжана. Сүл жилмүдт района администрацин болн бәәрн улсин дөнгр ик көдлмш күцәгдв. Селәдин аһу кеерүлж цеврәр бәрлһнд энд онц оньг тусхажана. Цевр уульнцс, хаалһс, эврә һаран кесн бичкдүдин плошадкс әмтнә нүд авлж, байр үүдәнә. Тер бийнь районд эн туст хаһлх төрмүд бәәнә. Района цутхлнг селәнд хог-бог асхдг шишлнг полигон бәәв чигн, ичр уга бәәрн әмтн хог-богасн теегт авч одад хайна. Района эргндк аһу харлһна ах специалистин келсәр, эн төриг хаһлхд дегд күнд биш. Селәнә улсин сойлла залһлдата төр болжана. Тер мет долан хонг болһн районд санитарн өдр болна.
Района эргндк аһу харлһна ах специалист Вячеслав Власовин келсәр, баснг өдр болһн районд санитарн өдр кех тогтавр бәәнә. Предприятьмудын-организацсин көдләчнр, тер тоод бәәрн улс темдглсн цагт арвн дөрвн часас авн арвн долан час күртл долан хонг болһн эднә медлд бәәх аһу цеврлж ахулна.
Санитарн болн йиртмж харлһна үүлдврин, селәдт зөв угаһар хог-бог асхдг йовдлмудын, гидротехническ сооруженьсин бәәдлин болн талдан чигн төрмүдәр танһчин йиртмжин көрнгин министр Николай Очиров Приютненск района толһач Иван Кравченкола тодрха күүндвр кев. Николай Очировин тоолврар, эврәннь нүдәрн цугинь үзәд, дор ормднь хурц төрмүд хаһлхла олз-туста болна. Хальмг танһчин йиртмжин көрнгин министр Николай Очировин келсәр, района сән дамшлтыг шинжләд, талдан райодт медүлх санан бәәнә. Сәәһинь болн мууһинь үзүлх кергтә. Му гиснь — зөв угаһар хог-бог асхдг йовдл.
Хальмг танһчд Приютненск район йиртмж харлһна хамгин ик чинртә һазр болжана. Энүнд Маныч һол хаврар болн намрар кесг сай шовуд амрна, хойр зун зүсн шовун үүрән ясна, эднәс арвн йиснь Улан Дегтрт орулгдв. Тегәд иим ховр шовуд харслһна төлә хаврар анһучлшго закан сән нилчән күргжәнә. Йиртмжин көрнгин министерствин әнгин ахлач Владимир Бадмаевин келсәр, хаврар анһучлһн ик һару күргнә. Шовуд бу халһнас икәр зовхш, зуг эдниг көндәһәд, үргәх керг уга. Усна шовудт хол һазрт нисхин төлә дала чидл кергтә. Энд амрад эдн ясрна.
Маныч-Гудило нуурар хавр болһн кесг сай шовуд нисж давна. Энүнд нарта-делкәд бәәх краснозобая казарка, оошг пеликан, хун болн талдан чигн шовуд нисж ирж амрна. Келхд, одахн кесг зун дуунад нисәд Хальмг танһчд казарк шовун нисж ирв.
Эргндк аһуд бидн кергтә оньган эс тусхахла, ке-сәәхн йиртмжиг геех әәмшг бәәнә. Мана бәәдг уульнцс церв-цер бәәхин төлә дала мөнгн керг уга. Кемр төрскн балһсндан эс гиж селәндән дурта болхла, эврәннь герин өөрк аһуг цевр-цер бәрх кергтә.
Бевина Мергн, Очра Сергей
