Инвалид улсиг дөннжәх әмтн шишлнг керг-үүлдвр бүрдәһәд, хотл балһсна гермүдин давшур бүрткв
«Равные возможности». Иим нерәдлһтә хамцу керг-үүлдвр Элст балһснд болв. Энүг инвалидмудын цугәрәсән ниицәнә региональн әнг болн танһчин бачһудын цутхлнгин көдләчнр бүрдәж давулв. Энүнә йовудт керг-үүлдврин орлцачнр социальн харслһна, коммунальн предприятьмудын, поштын болн банкин гермүдт ордг һазр хәләж шинжлв. Инвалид улс иим гермүдт ордг арһ уга болхла, эн предприятьмудын һардачнрт керг-үүлдврин орлцачнр бичг үлдәв. Энүнд инвалид әмтнд талдан улсла әдл таал бүрдәх сурвр тәвгджәнә. Цааранднь эн төрәр мана сюжетд тодрхаһар келгджәнә.
Гермүдт үүдн дегд уутьхн, һаза уульнцд өндр бордюрмуд болн өндр һазр боомтг болна. Александр Каманджаев балһсна цуг гермүдин давшур болһниг сәәнәр меднә. Өндр давшур энүнд ик харш болж, герт орж болхш. Энүнә келсәр, дегд күнд болна, зәрмдән күүнә дөн угаһар герт ордн арһ уга болна. Тер мет поликлиникд, аптекмудт орж болжахш. Кинотеатрин болн библиотекин тускар нам келәд керг уга гиж Александр темдглв. Мана танһчд бәәх коляскар йовдг күсдундур инвалид улст социальн обьектмудт ордг арһ уга болжана. Иим улсин төлә гер болһнд шишлнг пандус бәәх зөвтә. Болв ода Элтс балһснд иим шишлнг эв-арһ дегд баһ. Иим пандус бәәв чигн, нарта-делкән кемжәнлә ирлцжәхш. Каманджаевин келсәр, өдр болһн иим бәәдллә ноолдх кергтә болна. Магазинд өдмг, үс, талдан чигн хот-хол, хувц-хунр, аптект эм хулдж авч болжахш. Эн герт бидн орж чаджахшвидн. Зәрмдән соньн концерт хәләх дурн үрнә. Иим бәәдл чик биш. Инвалид улсин төлә кергтә таал бүрдәх зөвтә.
Учрежденьсин һардачнр иим шишлнг эв-арһ бәрх зөвтә. Болв эднә ик зунь энүнә тускар ммедв чигн, тас юм кежәхш. Эн жиләс авн “Доступная среда” нертә госудасртвенн программ экләд көдлх. Энүнә һол күцлнь — инвалид улсин төлә гермүдт орхин төлә боомтг бәәх зөв уга. Энүнә тускар олн-әмтнә фронтын болн инвалид улсин ниицәнә элчнрлә болсн харһлтд Владимир Путин келсн билә. Эн төриг дөрвн жилин эргцд хаһлхин төлә правительств дөчн долан жува арлснг йилһж өгчәнә. Болв премьерин тоолврар, иим керг-үүлдврмүд күцәснь бас баһ болх. Инвалид улст цуг халхар сән таал бүрдәх кергтә. Олн әмтн иим улст онц оньг тусхаж, дөн болх зөвтә. Тавн жилин эргцд инвалид бичкдүд талдан сурһульчнрла сурһуль дасх школмудын то нәәмн холванд өсәд, арвн минһнд күрх зөвтә.
Санкун Кермн, Бадмаран Владислав
