Ик-Буурла районд царцахала ноолда кежәнә
Хальмг танһчин зәрм райодт царцаха олар тархагджана. Хамгин күнд бәәдл эн туст Ик-Буурла районд тогтв. Әәмшгтә хортнла ноолда кехин төлә авиац олзлгджана. Эндр өдрт тавн минһн гектарин аһуд хорн цацгдв. Тер мет эн өдрмүдт дәкәд тавн минһн гетктарт хор цацх кергтә болжана.
Чоһран усна боодгин аһуд орж ирхлә, теегт болн хаалһин хажуд кесг түмн царцаха нисжәснь үзгдв. Иим бәәдл теегин цуг эргнд тогтв. Олн царцаха тежәл хәәһәд, эврәннь хаалһдан цуг урһмлыг уга кежәнә. Энүнәс көлтә малын идгүд, хаврин тәрән болн темснә урһц ик әәмшгтә бәәдлд тусв. Специалистнрин цәәлһсәр, бууядн урһцд царцаха ик хорлтан күргшго, юнгад гихлә, буудян урһц ода күцц болсврад, болжана. Района фермрмүд июнин эклцәр эврәннь чидләрн царцахала ноолда экләд кев. Болв өдр ирвәс хортна то өсәд йовна. Ода деерән эднд живр урһад уга. Тегәд иим кемд әәмшгтә хортнла зуг деерсә аһарас химикат асхад ноолдх кергтә.
Россельхозцутхлнгин специалист Татьяна Лиджиеван келсәр, хәләтн Чоһран усна боодгин өөр урһжах хулсиг царцаха яһж идж. Тас уга кечкв. Ода эдн цувгин көвәһәр тархагджана. Манцын кец эдл-ахуд күрч йовна. Цаарандан Маныч эдл-ахун буудян урһцд ик әәмшг учражана. Йир ик хорлтан күргжәнә.
Россельхозцутхлнгин специалист Татьяна Лиджиева хамдан көдлжәх әмтнлә хамдан июнин эклцәр азиатск царцаха олар цуглрсн орм илткж авсмн. Хамгин олар хортн Чоюһран усна боодгин өөр тархагдв. Нег үлү, ода царцаха харслһна чинртә йиртмжин бәәрнд олра тархагджана. Энд СанЭПиНа кемжәһәр нег дуунаас өөрхн химикатмуд олзлж болшго. Хәләтн усна боодгин өөр улан-шар орлмуд үзгднә. Энтн уснд чивәд үксн олн царцаха болжана. Уснд сәәнәр өөмнә. Тер бийнь уснд дегд дала царцаха үкв.
Эндр өдрт царцхала ноолда кехин төлә хойр сай арслнг йовулгдв. Ик-Буурла района селәнә эдл-ахуст кергтә мөнгнә дөн танһчин правительств бас күргхмн. Ик-Буурла района администрацин толһач Сергей Базыровин келсәр, мана специалистнрин тоолсар, царцахала ноолда келһнә төлә тавн сай арслнг кергтә. Тегәд танһчин правительствас дөн сурсн бәж. Көрнгин мөнгнәс маднл йилһж өгч гиж нәәлжәнәвидн. Эн төриг халһх гиж санжана. Деерәс нөкд болх зөвтә. Ода деерән эврәннь мөнгәр болн һазр олзлжах улсин мөнгәр царцахала ноолда кежәнәвидн.
Урдк жилмүдин дамшлтар царцаха олар тархалһна кемәс авн энүг хор цацад уга келһн күртл олн-зүсн зөвшәлин төрмүд хаһлхин төлә кесг цаг давж одна. Иим әәмшгтә хортнд живр урһад эдн нисхлә, энүнлә ноолдхд йир күнд болна. Тегәд царцахала эрт хаврин кемд шинкн хортн тархагджасн цагт ноолхла сән болна гиж специалистнр келнә.
Ээнән Ольна, Хулхачин Николай
