Ик Буурл селәнд өдгә цагин некврлә ирлцәтә шин эклц школ удл уга секгдх
Ик Буурла района цутхлнг селәнд «Хөрн негдгч зун жилин школ» нертә зура күцәх санан бәәнә. Ик Буурлд эрдмин училиш бәәсн герт ясврин көдлмш эн жилин ноябрь сард эклх бәәдлтә. Эрдмин дунд сурһуль жил хооран уга кегдсн билә. Эн халхар марһа шүүсн Әәдрхн балһсна архитектормуд ода проектн документац келһнә көдлмш күцәжәнә. Удл уга намрар нефтин компань нег обьект экләд шинрүлх зурата. Нег жил болад энүг эдлврт орулх күцл бәәнә.
Урднь эрдмин училиш бәәсн гер нег жилдән тас эжго бәәнә. Болв цөн сар болда энд тосхлтын көдлмш эклх. Хуучн гер шинрүләд, энд хөрн негдгч зун жилин эклц школ секх зура Ик-Буурла района һардачнр болн “КТК-Р” нертә акционерн ниицән темдглж авч. Эн тосхлтыг буйнч седклин социальн программар нефтин компань күцәх үгән өгв. Ик-Буурла района муниципальн бүрдәцин ахлачин дарук Александр Владимировин келсәр, багшнрин коллективла документац белдсн улс зөвшәрв. Шин школд компьютерн класс көдлх. Интернет олзлж болжана. Тер мет энд хойр зун күн хот уух столовь көдлх.
Тер мет йилһж өгсн мөнгн шин школын эргндк аһу кеерүлһнд бас йовулгдх. Райоан ахлачнрин тоолврар, энд бүрдәгдсн таал бичкдүд цогц-махмудан батрулһнд олз-туста болх. Александр Владимировин келсәр, спортын стадион өдгә цагин некврлә ирлцәтәһәр тосгдх. Футбол наадг бәәрнд искусственн девскр делггдхмн. Онц келхд, шин школ цуг өдгә цагин некврлә ирлцәд, эргнд хамгин сән сурһулин заведень болх.
Тер мет темдглсн зураһар талдан нег обьектд бас шинрүлһнә көдлмш кегдх. Келхд, эн тосхлт школас дала хол биш. Энд бичкдүдин байрта нертә садт оржах чеерүдән күләжәх бичкн көвүд-күүүкд орх. Харм төрхд, бичкддүин сад шинрүлһнә көдлмш ахр болзгт кедг арһ уга болжана. Шин эклц школ шинрүлһнә көдлмш төгсхлә, садын герт ясврин көдлмш эклхмн. Тер бийнь Ик Буурла селәнә улс иим зән сонсчкад ик гидгәр байрлв. Бәәрн улсин келсәр, зәрм бичкдүд садт ордг арһ уга. Шин сад секхлә селән нег хурц төр күцц хаһлгдхмн.
Ода болхла Ик Буурла района цутхлнг селәнд хойр зун көвдү-күүкд ордг зуг ор һанцхн сад көдлжәнә. Жил ирәвс сад орх бичкддүин чеерүд өсәд йовна. Района эрдм-сурһулин әнгин көдләчнрин келсәр. школд уд луга орх бичкдүдт онц оньг тусхагджана. РМО-н эрдм-сурһулин әнгин ах специалист Ирина Батееван келсәр, школд орх көвүд-күүкд Буратин ненртә бичкдүдин үүдәлтин цутхлнгд, школмудт секгдсн шишлнг багд болн талдан чигн һазрт белдвр кежәнә.
Багшнрин тоолврар, школын өмн көвүд-күүкдиг эрк биш сәәнәр белдх кергтә. Сурһмжлач Валентина Корнушкаеван келсәр, садт орсн көвүд-күүкд цуг халхаснь сән сурһмж авна. Энд эдн наадад, билг-эрдмән делгрүлнә, олн-зүсн наадлһна соньн программ бәәнә. Багшнр эднд ик нөкд болна.
Эзнә бичкдүдин сад секх санан бәәрн улсиг соньмсулх гиж района муниципальн бүрдәцин спцеиалистнр тоолжана. Иим садын дамшлт мана танһчла хам-хоша бәәх региомудт дала. Тенд иим сад кесг жилдән сән үзмжтәһәр көдлжәнә.
Чучян Валентина, Хулхачин Николай
