Игорь Зотов танһчин армспортын федерацд одв

Жил ирвәс һарин чидлән сөрх улсин то өсәд йовна. Энүнд танһчин премьер-министр Хальмгин армрестлингин федерацд одад, ил герч болв. Энд сурчах көвүд гиичд эв-дован болн хоршасн дамшлтан үзүлв.

Олн-зүсн марһанд орлцад өөдән ачлврмуд шүүж авсн көвдүиг Игорь Зотов йөрәһәд, күн болһна һаринь атхж мендлв. Тер тоод сецкин хамгин бичкн орлцач арвн негдгч классин сурһульч Роман Кан, Алдр Нохаев болн Данзн Бадмаев йовна. Көвүдин келсәр, армспорт эднд йир тааста спорт болв. Энүнд йоста баатрмуд дөрлднә. Нег-негнәннь һаран атхад, агчмин зуур дииләч йилһрнә. Тер бийнь түрүн хәләцд иим амр спортд сән күцәмж бәрхин төлә сән белдвр кех кергтә болжана.

Армспортын танһчин чемпион Данзн Бадмаевин келсәр, ода деерән спортын мастерин цол зүүх кергтә. Эннь түрүн девснг болх. Иргчдән болхла Европин, нарта-делкән чемпиона нер зүүхлә сән болх билә.

Премьер-министр Игорь Зотов болн армспортар нарта-делкән хойр дам чемпион Насир Халиков һаран атхад, мендлснь бат иньглтин темдг болв. Онц келхд, һарин чидлән сөрлһнә марһанд олн-зүсн эв-арһ олзлгдна. Эн өдр көвүд премьер-министрт армспортын техник болн эв-дов үзүлв. Удл уга нег сар болад эдн цугәрәсән марһанд орлцхмн. Тегәд энүнд сән белдвр кех кергтә.

Танһчин правительствин ахлач Игорь Зотовин келсәр, Элст балһснд хальмгин көвүд нарта-делкән чемпиона дамшлт хоршажахнь сән керг. Хальмг танһчин хамцу команд Әрәсән болн нарта-делкән чемпионатд орлцад, диилвр бәрхлә сән болх. иим керг дөннх зөвтәвидн.

Һарин чидлән сөрлһнә марһан йир соньн болсн деерән, чанһ-чиирг болхд сән нилчән күргнә. Нарта-делкән хойр дам чемпион Насир Халиков дамшлтарн хувалцсн деерән, секцд ордг көвүд йоста чидлән үзүлж, диилвр бәрхин төлә цуг арһ чидлән агсж ноолдх сурһмж өгв. Ик бульчнг болн баатр цогц һарин чидлән сөрлһнә марһанд ик тус болхш. Энүнд ик оньг кергтә, сән белдвр кех кергтә болжана, эрк биш диилвр бәрхәр зүткх кергтә.

Армрестлингин нарта-делкән хойр дам чемпион Насир Халиковин келсәр, Хальмг танһчд ирәд, тана көвүдт дамшлтан өгх зуратав. Ода деерән энд нарта-делкән чемпионмуд уга. Зуг чидлтә көвүд бәәнә. Эднд техник болн эв-арһ дасхжана.

Ода армрестлингар зуг һанцхн спортсменмүд соньмсжахш. Иим спортд талдан чигн улс ик дуран өгчәнә. Күн болһн ик баһ уга чидлән сөрхдән дурта. Зуг эдн иим кевәр бахан ханһаж зог кенә. Болв йоста спортсменмүд болхла олн-зүсн марһанд дамшлтан үзүләд, диилвр бәрхин төлә цуг арһ-чидлән агсж ноолдна.

Ээнән Ольга, Очра Сергей