Хуралын элчнр райодын депутатнрла өөрхн залһлда бәрж көдлжәнә
Хальмгин олн-әмтнә хуралын депутатнр райодт одад хамцу сүүр кеһәд, хурц төрмүдиг дор ормднь хаһлжана. Иим хург Сарпинск района Садовое селәнд болв.
Хальмг танһчин олн-әмтнә хуралын седвәрәр государственн йосна органмудын элчнр жил болһн танһчин нег районд цуглрна. Иим хургуд сән зангшалд тохрсн деерәр, өдгә цагт олз-туста болн ик чинртә харһлтст хүврв. Хуралын ахлач Анатолий Козачкон келсәр, селәнә улсин хурц төрмүдиг зуг дор ормднь одад, хаһлхла сән болна.
Селәнә депутатнр олн төрмүдәр сурврмуд белдж. Хамгин түрүн межбюджетн хәрлцәг заканла ирлцүлһнә төр эдниг үүмүлжәнә. Эн халхиг ик кезәнәс авн шинрүлж хүврлүлх кергтә билә. Өдгә цагт райодын хазн нурһлж зуг һазр нәәмәдлһнә алвна оруһас тогтна. Селәнә депутатнрин тоолврар, бюджетд көлгн-күчнә алв бас орулх кергтә. Сарпинск районд һазриг эзни кеәвр олзлһна болн һазрин туск зака сольлһна иргчин тускар хургт зүткәтә күүндвр болв. Района толһач Александр Мешков болн танһчин һазрин хәрлцәән министр Татьяна Бакинова малын идгүд хасрлһна тускар ухан-тоолврарн хувалцв.
Эднә келсәр, эн туст селән һазрт шишлнг специалистнр уга болжана. Хургт болсн күүндвр олз-туста болв гиж депутатнр темдглв. СНХ Хальмгин олн-әмтнә хуралын ахлач Анатолий Козачкон келсәр, иргч жилин бюджет батлж авхин өмн өргнд межбюджетн хәрләцәнә тускар дәкд нег күүндх кергтә. Келхд, межбюджетн хәрлцәнә заканд сольвр орулхин туск правительствин тогтаврин тосв һарв. Энүнд эндрк күүндврт орулж өгсн селвгүдиг бас оурлх арһ хәәх кергтә. Сарпинск РМО-н толһач Александр Мешковин келсәр, күүндвр сән ашта болв, энүнд олн әмтн орлцж ухан-тоолврарн хувалцв. Ода селән һазрт хаһлх төрмүд эдниг үүмүлжәхнь медгдв.
Улсиг көлгн-күчәр тетклһнә болн бачм чинртә бәәдлд докья өглһнә системин белдврин тускар Сарпинск районд болсн хамцу сүүрт депутатнр күүндвр кев. Удл уга танһчин цуг райодт 112 телефона тойгар зәнг авдг хамцу диспетчерск церглт экләд көдлх. Сүүрин хөөн депутатнр селәнә улсиг үүмүлжәх төрмүдлә өөрхн таньлдв. Үлгүрнь, Сарпинск района экономикин делгрлтд һахас өсклһнә халх сән нилчән күргхинь Хальмг танһчин олн-әмтнә хуралын ахлач Анатолий Козачко эврәннь нүдәрн үзв. Зуг эн кергиг ухатаһр күцәх кергтә.
Келхд, иим көдлмш Сарпинский нертә крестьянск-фермерск эдл-ахуд сәәнәр кегджәнә. Энүнд һахасиг автоматизированн эв-арһар асрна. Тегәд чигн энд нег жилин эргцд зурһан минһн һахан кичг авч болна. Эдл-ахун көдләчнр һахасин әәмшгтә гемәс әәлго көдлжәнә.
Татьяна Дмитриева, Колдан Церн
