Художественн гимнастикин марһан болв

Элст балһснд Лондона олимпийск чемпионк, Әрәсән спортын ачта мастер Алина Макаренкон мөрән төлә Бичкн фея нертә танчһин художественн гимнастикин секәтә марһан болв. Дөрлдән амрлһна өдрмүдт болв. Дәкәд нег тодлад келхлә, мана нертә спортсменк спортивн үүлдврән төгсәхин тускар зәнглсн билә. Танһчин дөрлдәнд Хальмгин уйн наста гимнасткс сән үзмж бәрәд, тренермудан байрлулв.

Өмн үзгин федеральн округин арвн балһсдын спортсменкс Элст балһснд ирәд дөрлдв. Зәрм күүкд иим марһанд түрүн болж орлцжана. Хамгин бичкнь — тавн наста. Гимнасткс дөрлдәнә өмн зөвәр үүмәд бәәв. Болв хамгин икәр эднә тренермуд үүммж. Эднә сурһульчнр талдан балһснд одад, иим марһанд орлцад уга бәәж. Әәдрхн балһснас ирсн зурһан наста Алиса Котован келсәр, художественн гимнастикин секцд һурвн жил хооран ирв. Ода негдгч разрядын цол зүүв.

Әәдрхн балһсна элч Алиса Котован келсәр, марһанд орлцхла соньн болна, таагдна. Талдан бичкдүд яһж дөрлджәхинь хәләхд туста болна.

Тавн наснас авн арвн негн нас күртл күүкд дииләчән йилһв. Энүнд Краснодар, Әәдохн, Ростов, Волгоград балһсдас ут-тоодан хойр зун тәвн гимнастк ирж Элст балһснд дөрлдв. Эдниг дөннхәр эк-эцкнрнь ирж. Эдн үүмәтәһәр эврәннь күүкдин бил-эрдм хәләж дөннв. Элст балһсна бичкүдин спортивн школын тренер Лариса Гайворонская тоолврар, иим марһана йовудт бичкн спортсменксин эрдм батрж делгрлт авх зөвтә.

Элст балһсна спортивн школын художественн гимнастикин тренер Лариса Гайворонская келсәр, бичкдүд марһанд орлцад дамшлт хоршана. Талдан спортсменксиг хәләнә. Иим спорт тархалһан төлә иим марһан бүрдәгднә. Олн күүкд художественн гимнастикар соньмсхла сән болх. Билгтә гимнасткс бәәнә, эн марһанд эдн билг-эрдмән үзүлж чадх.

Художественн гимнастикар көдлжәх күүкд чанһ-чиир теслттә болн чидлтә болх зөвтә. Оля Музраева гимнастикар дөврн жилдән көдлжәнә. Эн жилмдүин эргцд бичкн спортсменк хотл балһсна бюолн танһчин олн-зүсн марһаст орлцв. Тегәд чигн күүкн марһана өмн икәр үүмжәхш.

Элст балһсна элч Оля Музраеван келсәр, художественн гимнастик таасгдна. Кесг дәкж марһанд орлцжана. Гимнасткс ке-сәәхн цогцта болна, чикәр йовдг дасна.

Волгоград балһсна тренер Ольга Чистякова йирн зурһадгч жилд Атланта балһснд болсн олимписйк наадна призер. Ода тренер болж көдләд, бичкн гимнастксиг марһанд белднә. Энүнә сурһульчнр тренеран дураһад ие чинртә марһана призермудын тоод орх гиж Ольга нәәлжәнә.

Волгоград балһсна художетсвенн гимнастикин тренер Ольга Чистякован келсәр, марһанд эднә хөрн зурһан күүкн орлцжана. Иим дөрлдән эдн дурлж орлцна. Хамгин бичкнь зурһан наста. Хамгин ахнь арвн негн наста. Бичкн спорстменкст иим марһан олз-туста болна. Нег-негән хәләһәд, эндүһән чиклнә.

Бичкн гимнастксин дунд танһчин секәтә марһан һурвн жил даран бүрдәж давулгджана. Энүнд жил болһн олн спортсменкс ирж дөрлднә. Эннь художественн гимнастик мана танһчд делрглт авчах темдг болжана.

Баира Петрова, Котина Валерий