Хошуда хурлын тосхлтд Элстин сурһульчнр орлцх
Хошуда хурлд дөн күргх кергтә. Хальмг танһчин эрдм-сурһулин, сойлын болн номин министерств болн уйн наста бичкдүдин туризмин танһчин станц нег минһн нәәмн зун арвн хойрдгч жилин дәәнд Әрәсә Диилвр бәрсн хойр зун жилин өөнд нерәдгдсн керг-үүлдвр зарлв. Энүнә программар Хошуда хурлд баһчуд одад көдлх. Хамгин түрүнд Астраханск областьд Элст балһсна хөрдгч школын сурһульчнр һарч йовхмн.
Элст балһсна хөрдгч тойгта школын сурһульчнрин шин төсв Сүм харсхмн гиж нерәдгдв. Школын бичкдүд “Би — Хальмг танһчин гражданин” нертә танһчин марһана призермудын тоод орсмн. Көвүд-күүкдин тоолврар, Хошуда хурлын босхмжин төрт олна элчнр оньган өгхд иим көдлмш сән нилчән күргх зөвтә. Нег минһн нәәмн зун арвн хойрдгч жилин дәәнд хальмгин цергчнрин баатр зөрмг йовдл нерәдж хойр зун жил хооран Хошуда хурл тосхгдсмн. Элст балһсна хөрдгч школын классын һардач Рита Нохашкиеван келсәр, эн туст ик көдлмш кегдв, көвүд-күүкд йосна элчнрлә, депутатнрла харһад күүндв. Төгрг ширән сүүр конференц болв.
Хальмгин ик чинртә бумбин -хурлын туужин тускар сурһульчнр болн багшнр ик кезәнәс авн соньмсв. Хойр минһн доладгч жилд хөрдгч школын көвүд-күүкд Астраханск областьд одад ирлә. Тенд эдн алдр хальмгин хурлыг эврәннь нүдәрн үзв. Элстин хөрдгч школын туужин багш Светлана Тугусован келсәр, Астраханск областьд одсн йовдл сурһульчнрт йир таасгдв, олз-туста болв. Тер цагт хурл ямаран бәәдлд туссинь баһчуд эврән үзв. Тиигхд хурл хамхрад му дүрстә билә. Зуг энүнә нег әнгнь үлдж. Хурл босхлһна төр сурһульчнриг икәр үүмүлв.
Арвдгч классин сурһульч Анатолий Балкашин болн энүнә багш Баатр Балдаев улан залата хальмгудын онта зөөр болгч хурлын макет эврәннь һарарн кеж һарһв. Элстин хөрдгч классин сурһульч Анатолий Балкашина келсәр, иим макет үлдсн туужин материалар кегдв. Хурлын цамхг болн талдан чигн хуучн кезәнк тосхлт кехд күнд болв. Юнгад гихлә, хурлын тускар баһ зург үлдж.
Эндр сурһульчнрнин намрин амрлһна түрүн өдр хөрдгч классин көвүд-күүкд буйнч седклин керг-үүлдврәр эклжәнә. Эдн Астраханск областьд одад көдлхәр һарч йовв. Хошуда хурлын шинрүлһнә көдлмшт хальмгин баһчуд орлцх, хурлын эргндк аһу цеврлж ахулх. Тер мет тенд туужин кичәл болх, соньн экскурсь бүрдәгдхмн. Хошуда хурлд буйнч седклин дөн күргхмн нертә куерг-үүлдврт Элст балһсна талдан чигн школмуд орлцхмн.
Бевина Мергн, Котина Валерий
