Хату девскртә хаалһ тосххин тәлә элстихн эврәннь мөнгән өгх
Тадн танһчин зәнг хәләжәнәт, hарцан цаарандан өгчәнәвидн. Хаалһ тосгдх. Элст балһсна мэрийн һардачнр хотл балһсна ар үзгин райодын уульнцсин әмтнлә болсн харһлтд иим үгән өгв. Дәкәд нег тодлад келхлә, бәәрн әмтн арһан барад, мана Вести-Калмыкия программин журналистнрас дөн сурв. Эн уульнцд хату девскртә хаалһ уга болад, хур орхла кесг әмтн бальчгт йовж чадлго, зовлн үзжәнә. Ода эн төриг хаһлх ицл бәәнә. Зуг энүнә төлә бүрдәмжин көдлмш кех кергтә.
Элстин муниципалитетин элчнр Шахматная, Витражная, Рельефная болн Геодезистов нертә уульнцсин бәәрн улсла харһлт кев. Нарта чилгр өдр болсн харһлт олз-туста болв. Эн уульнцсин әмтн арвн жилдән хату девскртә хаалһ бәрхин тускар йоста ноолад кежәнә. Эн харһлтын хөөн эн хурц төр хаһлгдх бәәдлтә. Болв ода байрлхд эрт. Харһлтд орлцсн мэрйин администрацин толһачас, энүнә дарукас, балһсна ведомствсин, тер тоод Водоканалын элчнрәс әмтн эдниг үүмүлжәх төр хаһлхинь сурв. Болв эднә хамгин һол төрнь — асфальтированн хаалһ кех кергтә. Северная нертә уульнцин бәәрн күн Санл Боваевин келсәр, эмчин машин нааран ирж чадлго, хойр күн өнгрж одв. Хаалһ дегд му. Машиһан ик холд үлдәнәвидн.
Элстин захд энд бәәх хаалһсиг нам хаалһ гиж келж болшго. Күн биш машин хур орхла йовж чадхш. Бәәрн улс күзүцә бальчгар йовна. Нег үлү, нааран бачм чинртә медицинск дөн күргдг машин ирж чаджахш. Тегәд арһ уга гемтә улс асфальт күртл йовһар йовна. Хамгин түрү бәәдлд медәтә улс тусв. Пенсионермуд гертхсн һардг арһ уга болна. Эн күүкд күүнә келсәр, хур орхла, бальчгар йовж болхш. Зуг трактора йовж болх. Энд хату девскртә хаалһ бәрх үгән Элтсин ахлачнр өглә гиж эн залу келв. Оньдин резин һос белдж авх кергтә болна гиж эн күүкд күн темдглв.
Эн жил федеральн бюджетас ирсн мөнгәр балһсна зәрм хаалһс шинрүлж ясгдв. Энүнә төлә найн йисн сай асрлнг һарв. Эн жилин чилгкл Шахматная нертә уульнцд долан зун далн метрт хату девскртә хаалһ татх зура бәәнә. Мэрийн әнгин ахлач Валентина Малиеван келсәр, энүнд нег сай арслнг кергтә болх. Энд дав-зуур шебень асхгдад, хаалһ ясгдх. Хөөннь асфальт делггдх зөвтә.
Малиеван зәнглсәр, Элст балһснд ода һурвн зун уульнцд асфальтированн хаалһ уга. Хотл балһсна ар зүгин района улст тавн зун дөрвн метр хаалһ келһнд дөн болх селвг орулж өггдв. Дөчн герин эздүд материал хулдж авхин төлә хойр зун арвн негн минһн арслнг цуглулж авх зөвтә. Көдлмшин мөнгиг һурвн зун минһн арлснгиг муниципалитет даах. Ода бәәрн әмтн мөнг хураж авх зөвтә. Шахматная уульнцин бәәрн күүкд күн Оксана Батиеван келсәр, мөнг әмтнәс цуглулж авхд күнд болх. Нег үлү, зәрм пенсонермуд иим ик мөнг өгч чадшго.
Тер өдрин бийднь мэрийн элчнр талдан элстин уульнцсин улса харһад, хаалһин төрәр күүндв. Шахматная уульнцин әмтн болхла ода кедү мөнг цуглулж авхинь тоолж һарх зөвтә. Эн мөнгиг бәәрн улс ахр болзгт цуглулж чадшго бәәдлтә.
Гюзелян Татьяна, Хулхачин Николай
