Хальмгт ода теегин гөрәс анһучлж болшго

Региональн правительствин тогтаврар эн жилин февралин арвн нәәмнәс авн хойр минһн хөрдгч жилин декабрин һучн негн күртл теегин гөрәс анһучлж болшго. Эн туст ода мана танһчд күнд бәәдл тогтв. Сайган то жил ирәвс баһрда йовна. Тер мет эн болзгт гөрәснә мах, ноос, өвр хулдж болшго.

Йиртмжин корнгин министрин дарук Баатр Убушаевин келсәр, сүл цагт кесн шинжлтын ашт ода Хальмг танһчд долан минһн теегин гөрәсн бәәнә. Давсн зун жилин йирдгч жилмүдт эднә то долан зун минһнд күрчәсмн. Эннь тер сүргәс үлдсн гөрәсн болжана. Кесг жилдән аврлт угаһар сайга хаж авлһна ашт иим күнд бәәдл тогтв. Теегин гөрәс харслһна отрядт зуг дөрвн күн үлдв. Эдн бу-селмтә браконьермудла ноолда кеж чаджахш.

Танһчин йиртмжин көрнгин министрин дарук Баатр Убушаевин келсәр, дөрвн-тавн жил хооран административн халхар хүврлт кегдснә ашт федеральн цутхлнгас күцц зөв регионмудт өггдв. Тиигхд кесг сән тоот геедрв. Ода райодт охотоведмуд көдлжәхш.

Тер саамд мана танһчд эн төрт оньдин ик оньг тусхагдг бәәсмн. Эн төрәр кесг конференц, селвлцән болв, олн-зүсн инстанцд дуудвр бичгдлә. Сайга харслһна федеральн цутхлнгд батлж авхин тускар кесг дәкж келгдсн билә. Зуг ода эн төр дор ормас көндрх бәәдлтә. Әрәсән йиртмжин көрнг харслһна министерствд ховр болн тас уга болх әәмшгтә мал-аһрус харсж авлһна программ белдж авгдв. Специалистнрин тоолврар, эн туст тогтсн күн таалд иим программ сән нилчән күргж, сайга харслһнд туслх зөвтә.

Баатр Убушаевин келсәр, батлж авсн федеральн программд өвәрц болн ховр зерлг ангуд харслһнд ик оньг өггджәнә, тер тоод ирвсг, цасна барс ангиг харсж авх төр тәвгджәнә. Тер тоод теегин гөрәсн йовна. Сайга харслһна болн эднә то икдүлхин төлә федеральн бюджетас мөнгн ирх гиж күләгджәнә. Район болһнд ховр зерлг мал-аһрус харслһна һурвн көдләч көдлх зөвтә.

Тер мет правительствин батлж авсн тогтаврар, хойр минһн хөрдгч жил күртл гөрәснә, мах, арс болн өвр хулдж болшго. Давсн зун жилин йирдгч жилмүдт теегин гөрәс хаж авад, өврин Китдин орн-нутгт һарһж хулддг билә. Ода чигн браконьермуд иим кеәвр ик ору авчана.

Баатр Убушаевин келсәр, ода Элстин олн давхрта гермүдт сайган өвр хулдж авх зар дала бәәнә. Ода иим хулд кеж болшго. Хуучн теегин гөрәснә өвр хулдж авсн әмтн административн засгла харһулгдхмн.

Ода Әрәсә талдан орн-нутгудас үлгүр авч чадх. Хам-хоша бәәх Казахстанд шишлнг государственн программ батлж авсна хөөн, , сайган то зун минһн толһад күрв.

Баатр Убушиевин келсәр, Европин ниицәнд йоста орм эзлхәр седхлә, иим өвәрц мал-аһруснд кергтә оньг тусхаж, энүг эрк биш харсж авх кергтә. Эс гиж хөөннь теегин гәрәснә то басхж авч болшго.

Чучян Валентина, Настан Сергей