Хальмгин университетд Китдин долан хонгт нерәдгдсн керг-үүлдвр эклв
Әрәсән болн Китдин хоорнд эрдм-сурһулин болн сойлын хәрлцә делгрүлһн. Китдин долан хонгт нерәдгдсн керг-үүлдвр Хальмгин государственн университетд эклв. Долан хонгин эргцд мана танһчд Китдин тужин, сойлын тускар конференц болх, төгрг ширән сүүр бүрдәгдх, багшнр лекц умшх, китдин кел дасжах оютнр болн сурһульчнр медрлән болн дассн эрдмән үзүлх.
Добро пожаловать в Пекин гиж эн частрт келгджәнә. Хойр минһн йисдгч жилд эн частрар китднр олимпийцнриг тосж авсмн. Эн байрин асхна йовудт оютнр болн һазадын ордудын багшнр китд келәр шүлг умшв, ду дуулв. китдин орн-нутгин сойл болн эн һазриг туурулжах үүдәврмүд олар келгдв.
Эн оютна келсәр, иим нәр-наадн болснд ик байрта бәәнәв. Иргчдән китд кел дасад, эн халхар көдлх санатав гиж эн келнә.
Ректор Бадм Салаев байр секлһнд келсн нүр үгдән Волгоградск социальн-педагогическ университетас ирсн гиичнрт ик ханлтан өргв. Тенд ода китд кел бас дасжана, Тянзинск университетла өөрхн залһлда бәрж көдлжәнә. Университетин ректор Бадм Салаевин келсәр, ода нарта-делкән программар мана оютнр Китдин орн-нутгт сурчана, багшнр дамшлтан өөдлүлжәнә. Хйор келн-улс хоорндан йовлцад, нег-негнәннь сойл, тууж меджм авснь сән керг болжана.
Өдгә цагт Хальмгин государственн университетд Китдин олн-әмтнә республикас һучн оют сурчана. Хальмгин көвүд-күүкд болхла Шанхайск болн Пекинск деед сурһульд дасжана. Иим өвәрц орн-нутгт сурх арһ уга болсн болхла, талдан эрдм шүүж авх биләв гиж эн күүкн келнә. Негдгч курсын оютна келсәр, китдин келн йир икәр таасгдна. Иргчдән эн орн-нутгла эврәннь жирһлән залһлдулх саната. Тенд сурх санан бәәнә.
Волгоградск социальн педагогическ университетин багш Вера Коваленкон тоолврар, эднә деед сурһульд хальмгин государственн университетин дөнгәр Конфуцин нертә институт бүрдәгдснь йир сән керг болв. Волгоградск университетин багш Вера Коваленко келсәр, хальмгин деед сурһулин багшнр Аһш балһснд ирәд. лекц умшсн билә. Хальмгин университетин багшнрин дөнгәр нег жил хооран Конфуцин нертә институт секх арһ учрв.
Мана университет иим олз-туста керг күцәснь, хальмгин деед сурһуль өдгәц агин некрлә үүлджәнә гисн герч болв. Баһчудас сән үлгүр авад, бөдүн улс чигн китдин сойлар соньмсдг болв. Удл уга хальмгин университетд китдин гимнастикин секц көдлх. Энүнә хөөн китдин кел дасхд амр болх.
