Хальмгин университетд документ орулж авлһна кем төгсв

Эн өдрмүдт хальмгин государственн университетд Әрәсән талдан деед сурһулин заведеньсла әдл абитуриентнрас документ орулж авлһна кем төгсв. Ода эдниг оютнрин тоод орулж авчана. Энүнә ашнь августын тавнд медгдх. Ода деед сурһулин зәнглһнә стендт болн сурһулин заведеня йосна сайтд ЕГЭ-н шүүврин ашт сурһульчнрин авсн балл барлгдв. Тер саамд приемна комиссь көдлшән цаарандан күцәжәнә. Эн жил Хальмгин университетд танһчин баһчуд олар орж сурх саната.

Хойр долан хонг хооран энд тас талдан бәәдл бидн үзләвидн. Энд бәәсн ширә болһна өрр ик чеерүд цуглрдг билә. Ода болхла приемн комиссьт күн баһ, тегәд чигн шуган уга, тагчг. Специалистнрин келсәр, деед сурһульд орх саната баһчуд эрлһ орулж өгхләрн кергтә документыг зерг авч ирв. Теднә тоод Лидия Оруджова йовна. Колледжин түрүн күрст сурчаһад деед сурһульд орх зура бәәсмн гиж күүкн келнә. Дун эрдмин сурһуль төгсәчкәд, удан ухаллго Хальмгин государственн университетд документан орулж өгв. Эврәннь спортивн эрдмән цаарандан делгрүлх саната.

Лидия Оруджован келсәр, спорт баһчудт ик чинр зүүжәнә. Спортивн факультетд орх саната. Пауэрлифтингин спортын кандидат. Тренернь Игорь Настинов.

Тер мет Валентина Борлаева эврәннь ач көвүнә кесн шүүвриг дөннжәнә. Сергей Петькиев школдан сурчасн кемд, өсхләрн программистын эрд дасхар шиидв. Ода иим сурһуль дасхин төлә ик холл һазрт йовх керг уга. Эннь йир эвтә болжана гиж көвүн келнә.

Валентина Борлаеван келсәр, түрүн авгтан Молсква балһснд одх сана билә. Болв эн жил Хальмгин университетд шин эрдм секснә хөөн, нааран орхар седжәнә. Бизнес информатика эрдм таасгджана. Ода Хальмгин деед сурһульд олн эрдм ав болх, хойрдгч эрдмәр сурч болна.

Проректор Владимир Мушаевин келсәр, эн жил хальмгин университет эрдм-сурһулин программиг икдүлв. Ода энүнд баһчуд һучн тавн эрдәмр сурчана. Эннь зуг бакалавриатын девснгд. Келхд, шин энгс факультет болһнд секгджәнә. Үлгүрнь, аграрн факультетд ветеринарин эрдмәр сурч болх. Энүнд олн көвүд-күүкд орх саната.

Проректор Владимир Мушаевин келсәр, эн бакалавриатд шин эрдм секгдв, эннь ветеринария. Энүнд олн баһчуд орхар седжәнә. Тер мет гуманитарн факультетд документоведение болн архивоведении эрдм секгдв. Экономическ факульететд экономическ әәмшг уга бәәлһнә эрдм. Энд бооцаһар сурч болх. Талдан чигн шин эрдм секгдсн бәәнә.

Физик-эсвин номин доктор Бадма Михаляевин тоолврар, физикин эрдм иргчдән һол орм эзлх. Энүнә келсәр, Хальмгин һол деед сурһульд государств дөн күргжәнә. Ода энд шин инновационн әнг секгдв. Келхд, Хальмгин университет өдгәц агин некврлә ирлцжәнә.

Физико-эсвин номин доктор Бадма Михаляевин келсәр, эн жил шин эрдм материалмудын химий болн физикин эрдм. Иим эрдм өвәрц нертә. Энүнд нанотехнологийн специалистнр сурх. Ода иим эрдм Әрәсәд ховр. Хальмгин университет эн тоод нүүрт йовна.

Деед сурһулин проректор Владимир Мушаев Хальмгин университетин иргчин болн манһдур ямаран баһчуд нааран ирхин тускар келж өгв.

Абитуриентнрас документ орулж авлһна көмпань төгсв. Энүнә урдаснь кесн то-диг иим. Зурһан зун жирн долан бюджетн ормд приемна комиссин зәгнлсәр, һурвн минһ һар эрлһн орулж авгдв. Давсн жиллә дүнцүлхлә, ЕГЭ-н шүүврин ашт өөдән балл авсн болн медальта көвүд-күүкдин то ик болв. Эн жил школан латн медаляр төгсәсн жирн нәәмн көвүн-күүкн университетд оржана.

Университетин проректор Владимир Мушаевин келсәр, экономикин болн юристын эрдмәр орхар седсн баһчуд баһ балл авсн болхла, талдан өөрхн чинртә эрдмд орж чадх. Хойрдгч курсын хөөн эдн экономикин болн юристын эрдмәр эврәәнь сурчах эрдмлә зерг сурч чадажана. Экономикин болн юристын эрдм дасх улс олн, зуг бюджет норм баһ. Тер мет эн жиләс авн Сбербанкд сурһулин кредит авч болх. Зәрм мөнгиг государств даахмн.

Эн жил Хальмгин государственн университет нарта-делкән нөкцлтин бас икдүлв. Эн жил энд һучн орн-нутгас һурвн зун оют ирж сурх.

Чучян Валентина, Мятежный Максим