Хальмгин спортсмен күрл мөнгн медаль шүүж авв

Хальмг танһчин спортсмен Бакур Абушинов вовинам вьет во дао эв-арһар болсн һурвдгч нарта-делкән чемпионатын ашар күрл мөнгн медаль шүүж авв. Марһан Париж балһснд болв. Диилвр бәрхин төлә һучн орн-нутгас дөрвн зун бөк дөрлдв. Күрл мөнгн медаль шүүж авсн спортсмениг Хальмг танһчд энүнә өөрхн улс, элгн-саднь бүләнәр тосж авв.

Сән үзмж бәрсн спортсмениг энүнә өрк-бүлнь болн нәәжнрнь тосж авв. Эдн Бакуриг хамгин сәәнәр дөннв. Тегәд чигн энүг бахмжатһар болн байртаһар тосв. Эцкнь көвүнә һарин атхад бас йөрәв. Иим жирлһин хаалһ шүүж авад, ода сән күцәмж бәрснд эцкин тәвц бас бәәнә. Париж балһснд болсн марһан йир зүткәтә болн күнд болв. Нарта-делкән хамгин сән гисн спортсменмүд цуглрсн дөрлдәнд хамгин сән техник үзүлхд амр биш болв. Тегәд чигн зуг эврәннь чидлдән нәәлж дөрлдв гиж Бакур келнә.

Вовинам вьет во даө бөк бәрлдлһәр нарта-делкән чемпионатын призер Бакур Абушиновин келсәр, иим диилвр бәрх сана зүүж. Зуг нарта-делкән марһанд күрл мөнгн медаль шүүж авх гиж санжасн уга. Эн жилин апрель сард тренер Василий Бембишев сәәһән хәәв. Эн диилвриг эврәннь тренерт нерәдв. Хамгин түрүн сән үзмж бәрх сана зүүх, тиигхлә диилвр ирх.

Эн видезургудыг танһчин командын элчнр цокж авч. Әрәсән хамцу командын ханьд арвн тавн спортсмен орв, эднәс зурһан бөн күрл мөнгн медаль шүүж авв. Бакур Абушинов жирн нәәмн килограммин чиннүрт дөрлдв. Марһан олимпийск системар болв. Диилгдсн бөк цаарандан ноолдх зөв авсн уга. Хальмгин спортсменла Испанин, Италин бөкнр чидлән сөрв. Аштнь хойрдгч орм эзлхин төлә Ирана элчлә ноолдв. Зүткәтә ноолдана ашт хальмгин бөк һурвдгч орм эзлв. Бакурин келсәр, Ирана бөк сән дамшлт үзүлв.

Эн көвүнә келсәр, иим нәәж бәәснд ик бахмж кежәнә. Иргчдән энүнәс ик диилвр бәрхинь дурджана. Иим диилврин кесг жилдән күләж. Ода ик байрта бәәнә. Нарта-делкән чемпионатд мана командас бөкнр орлцснь сән темдг. Цаарандан чигшн эдн диилвр бәрх гиж эн спорсмен нәәлжәнә.

Вовинам вьет во дао бөк бәрлдлһнә эв-арһар Бакур Абушинов зурһан жилдән ноолджана. Эн цагин эргцд олн диилвр бәрж чадв. Зуг энүнә эцк Алексей Абушиновин келсәр, Париж балһснд шүүж авсн медаль хамгин ик чинр зүүжәнә. Энүнә келсәр, көвүнь олн-зүсн спортын секцд орла. Болв аштнь вьетнамин эв-арһ шүүж авла. Эн халхар сән күцәмж бәрв. Ода көвүһәрн бахмж кеж болх гиж эн темдглв.

Бакурин эцк Алексей Абушиновин келсәр, көвүн диилвр бәрснь ик бахмж болжана. Әрәсән, Хальмг танһчин нер харсад ирв. Күрл мөнгн медаль шүүж авснь ик байр болжана.

Париж балһснд болсн марһанд һучн орн-нутгас дөрвн зун спортсмен ирж орлцв. Дәәчин искусствин Әрәсән ниицәнә филиалын күцәгч директор Олег Куберлиновин келсәр, Әрәсән спортын мастер Бакур Абушинов марһанд цуг арһ чидлән агсж ноолад, шүүврән сәәнәр өгв. Ода дорд үзгин эв-арһар бөк бәрлдлһн зуг урмдта улсин нилчәр делгрлт авчана. Тер бийнь вовинам вьет во дао эв-арһар олн баһчуд соньмсжана. Тегәд ода Бакур эднд сән үлгүр үзмж болжана.

Дәәчин искусствин Әрәсән ниицәнә филиалын күцәгч директор Олег Куберлиновин келсәр, иим диилвр ик чинр зүүжәнә. Баһ наста спортсменмүдт эннь сән үлгүр болх. Телевизорар мана чемпионмудыг үзәд, баһчуд эврән спортар соньмсх зөвтә.

Ода күнд сурһуль ард үлдв, зүткәтә ноолдан төгсв. Хамгин һол төрнь — сән үзмж бәрж чадв. Тегәд ода невчк бийән сулдхад, амрч болх. Теегин церв аһар кииләд, амрх санатав гиж Бакур Абушинов келнә. Энүнә хөөн дәкнәс шин марһан энүг күләжәнә.

Ээнән Делгр, Ирчин Алексей