Хальмгин прокуратур ончта өөнән темдглв
Хальмгин прокуратур йирн жилин өөнән байрин бәәдлд темдглв. Эн халхин көдләчнрин ик зунь цуг арһ-чидлән агсж көдлв.
Ветеранмудын хоршасн байн дамшлтыг өдгә цагт баһ наста прокурормуд олзлж көдлжәнә. Урднь прокуратурин халхар көдлжәсн әмтн ода ветеранск организацин ханьд оржана. Эдн ода чигн арһ чидләрн баһчудт дөн күргжәнә.
Өдгә цагт прокуратур государствин бат түшг болж көдлджәнә. Зака болн олна диг-дара харлһна халх харсдг ик чинртә даалһврта. Государтственн институт болсн учрар прокуратур онц орм эзлжәнә. Цуг халхар әмтнә төвкнүн бәәдл-жирһл теткдг улсиг йөрәхәр танһчин ведомствсин һардачнр болн хам-хоша бәәх регионмудын элчнр олар ирв. Тер мет ончта өөнләнь йөрәхәр Хальмг танһчин толһач Алексей Орлов ирж. Тана көдлмш өдгә цагт ик чинр зүүжәнә, эн халхин көдләчнр оньдин зака харлһна туст нүүрт йовад, әмтнә зөв харсж кесг улст дөн болжана гиж Орлов йөрәлин үгдән темдглв.
Байрин өдлрт прокуратурин көдләчнр билг-эрдмән үзүләд, цуглрсн улсиг икәр өврүлв. Йоста профессиональн артистнрла әдл эдн ду дуулад, би биилв, шог наад тәвцхәв.
Төрскән харсгч дәәнә цагт әмән әрвллго дәәлдәд, әмнәсн хаһцсн прокуратурин көдләчнриг ода көдлжәх әмтн мартжахш. Утта-Цаһан Амн хаалһин жирн тавдгч дуунад, Эрдниевское селәнә өөр санлын мемориал бәәнә. Энүг өдгә цагт амр биш көдлмш күцәжәх прокуратурин көдләчнр тәвсн бәәж. Хальмг танһчин прокурор Сергей Табельский келсәр, дәәнә цагт цус-махан асхж, дәәлдәд әмнәсн хаһцсн улст иим бумб тәвгдв. Төрскән харсхин төлә прокуратурин көдләчнр талдан улсла хамдан хортнла сүркә дәәнәд ноолдв.
Прокуратуцрин халхар олн жилдән кинән кеәвр көдләд, улсин зөв харссн улсин тускар бүлән үгмүд байрин йовудт келгдв.
Өдгә цагт Хальмг танһчин прокуратурт олн жилдән көдлсн дамшллтта специалистнр көдлжәнә, эднлә хамдан гүн медрлтә баһчуд зака харлһна туст үүлджәнә. Ода эднә һол күцлнь — чиновникүди ведомствсин болн онц улсин көдлмшт зака эвдсн йовдлмуд илткж авлһна төр хаһлх даалһвр бәәнә. Тер мет эндр өдрт эднә ик дааврта талдан нег күцлнь — коррупцла ноолда кех цаг ирв.
Гольдина Ирина, Очра Сергей
