Хальмгин бөк Мингиян Семенов, гимнастк Алина Макаренко, гандболистк Людмила Бодниева Лондон балһснд дөрлдхмн
Июлин хөрн доланд Лондон балһснд Олимпийск наадн байрин бәәдлд секгдхмн. Әрәсән олимпийсек командын ханьд Хальмг танһчин элчнр орсна тускар сонсчкад, элстихн икәр байрлв. Дәкәд нег тодлад келхлә, Хальмгин спортсменмүд — бөк Мингиян Семенов, гимнастк Алина Макаренко болн гандболистк Людмила Бодниева Лондон балһснд дөрлдхмн.
Олимпиадт орлцх улсин нерд медхш, зуг танһчин әмтн бәәхнь меднә. Бөк Минигиян Семенов болн гимнастк Алина Макаренко Олимпиадт орлцхнь ик байр үүдәв. Мана спортсменмүд сән күцәмж дурджана.
Лондон балһснд болх Олимпиадт бөкнрин марһа хәләх улс дунд Александр Очиров йовна. Греко-римск янзар бөк бәрлдлһнә федерацин танһчин асрулин хүүвин ахлач Әрәсән спортын үүлдәчнрин делегацин ханьд Лондон балһснд одх. Августын тавнд болхла эдн мана һазра нертә бөк Мингиян Семеновин ноолдаг ик оньган өгч хәләх. Специалистнрин тоолврар, хөрн хойр наста спортсмен йир сән күцәмж бәрж чадв. Нарта-делкән олн-зүсн дөрлдәнд диилвр бәрсмн. Саранск балһснд болсн Әрәсән чемпионатд түрүн орм эзлсн деерән, турнирин хамгин сән бөк гисн нер зүүв. Тер дөрлдәнд олимпийск чемпион Назир Манкиев энүнд диилгдв. Тегәд чигн Семеновиг Хальмг танһчд төрскн һазртнь баатрла әдл тосв. Мөнгнә мөрәһәр, шин автомобиляр ачлв, Хальмг танһчин физическ культурин болн спортын ачта көдләч гисн нер зүүлһв. Ода болхла Әрәсән олимпийск командын ханьд орсн ик байрта зәнг болв.
Бөк бәрлдлһнә федерацин көдләч Александр Очировин келсәр, хальмгин спортын туужд иим байрта йовдл учрад уга. Жирн нәәмдгч жилд Лев Балдашинов кандидатнрин тоод орла. Болв хамр төрхд тиигхд Олимпиадт орлцсн уга. Минигиян Семеновар бахмж кежәнә.
Тәвн тавн килограммин чиннүрт олимпийск алтн медаль шүүж авхар августын тавнд мана бөк Мингиян Семеновла кен ноолхдхнь ода күртл медгдәд уга. Специалистнрин келсәр, ода деерән Семенов сән белдвр кеһәд, ямаран чигн бөклә ноолдхдан әәжәхш. Александр Очировин темдглсәр, Минигяна икрнь бас Лондон балсһнд одад, ахан дөннх. Тер мет эднә аавнь бас одх. Цуг Хальмг танһч диилвр бәрхинь күләжәнә.
Эн өдрмүдт Элст балһснас Лондон балһснд мана нертә гимнастк Алина Макаренкон тренер Людмила Гальченко бас һарч йовжана. Арвн зурһан наста спортсменк мана орн-нутгин олимпийск командын ханьд бас орж. Ода әрәәсн гимнастк нарта-делкәд хамгин сән гисн нерән дәкәд нег иткүлх зөвтә. Гальченкон тоолврар, иим күәчмж бәрхд ик нәәлвр бәәнә. Урднь Алина олн диилвр бәрсмн. Сингапур балһснд болсн уйн наста спортсменмүдин Олимпиадт мана гимнастк орлцад, чемпиоан нер зүүсмн. Лондон балһснд һарч йовхин өмн өргнд Алина Макаренкод Әрәсән спортын ачта масетрин күндтә нерн зүүлһгдв. Ода мана спортсменикг олн улс йөрәжәнә.
Тер тоод Англьд болх Олимпиадт эрк биш диилвр бәрхинь дурджана. Тер мет Әрәсән ганбольн командын ханьд мана һазра күүкн Людмила Бодниева бас түрүн орм эзлх гиж танһчин әмтн нәәлжәнә. Эннь Людмилад хамгин түрүн Олимпиад болхмн. Пекин балһснд болсн дөрлдәнд Бодниева орлцж чадсн уга. Энүг угаһар Әрәсән команд Данин спортсменкст шүүгдлә. Тренерин тоолврар, тер цагт Бодниевлал әдл иим ик дамшлтта гандболистк Әрәсән командын ханьд уга билә. Ода болхла мана орн-нутгин команд түрүн орм эзлх саната.
Чучян Валентина, Очра Сергей
