Хальмгин бичкдүд фестивальд диилвр бәрв

“Терпсихора России” нертә цугәрәсән бииһин йисдгч фестиваль-марһанд Веснушки ансамбль диилвр бәрв. Эдн гран-при, олн-әмтнә онц би номинацд негдгч девснгин диплом шүүж авв. ЮНЕСКО-н бииһин нарта-делкән ниицәнә гешүд Виктория Солодкая болн Николай Болдыревин сурһульчнр бас түрүн орм эзлв.

Хальмгин бичкдүд иим кевәр цуглрад эврәннь кергән сәәнәр меддг жюрин болн худлжественн коллективмудын һардачнрт һурвн дундур жилдән багшнр дасхсн билг-эрдмән үзүлв. Долан-нәәмн наста көвүд-күүкдт иим марһан түрүн болж һарчана. Тегәд эднә бәрсн диилвр ик чинр зүүжәнә. Болв хамгин икәр бичкдүдин экнр үүмәд бәәв.

Занда Ендонован келсәр, жюрин гешүдт мана күүкд йир икәр таасгдв. Эдн кесгтән альхан ташв. Нег үлү, хамгин бичкн көвүд-күүкд биилхлә эдн икәр байрлв. Хальмг би эднә зүрк авлв.

Маргарита Бадмаеван келсәр, марһанд тәвн коллектив дөрлдв. Кавказин республикин бичкдүдлә зүткәтә дөрлдән болв. Энүнә көвүнь диилвр бәрснд ик байрта бәәнә.

Маргарита Бадмаеван Данзн көвүнь олн-әмтнә онц би номинацд иим ик марһанд диилвр бәрв. Данзн Бадмаевин келсәр, энүнә биилсн би йир күнд. Семрдг би биилхд амр биш. Энүг Эмба Манджиев биилж йовла.

Көвүнә келсәр, марһанд Әрәсән Өмн үзгин цуг регионмудас кесг бичкдүдин коллективмуд ирсн бийнь дегд икәр үүмсн уга. Ессентуки балһсна концертн плошадкт сурһульчнр билг-эрдмән үзлсн цагт кедү үүмсән багшнр ода күртл мартжахш. Иим сән күцәмж бәрснд багшнрин ик тәвц бәәнә.

“Веснушки” нертә бичкдүдин бииһин коллективин һардач Виктория Солодкая келсәр, хальмгин бичкдүд марһана түрүн цуг мөрә шүүж авад, диилвр бәрв. Иим диилвр зүткәтә марһанд эдн бәрв. Марһан ик чинртә болв.

Хальмг танһчин ачта артист, хальмг бииһин багш Николай Болдыревин келсәр, иим билгтә бичкдүдлә көдлхд соньн болв. хальмг би дасхж авх амр биш. Эдн түрүн авгтан чикәр биилж чаддго билә. Ода иим диилвр бәрснд хойр дам байрта бәәнә. Эк-эцкнрин болн багшин итклиг ханһаж чадв.

Ноябрин зурһанд Виктория Солодкая болн Николай Болдырев ЮНЕСКО-н бииһин нарта-делкән ниицәнә гешүд болв. Энүнә президент Алкис Рафтис эднд иткүлин цаас бәрүлж өгв. Эднлә хамдан хальмгин дәкәд нәәмн бииһин эрдмчнр иим цол зүүв. ЮНЕСКО-н туужд түрүн болж иим йовдл учрв. Иим нер зүүснь көдлмшт немр урмд өгчәнә гиж эдн келнә. Сурһульчнр болхла дамшлтан өөдлүләд, багшнрасн давж өсх арһ бәәнә.

Хавтхна Элла, Очра Сергей