Хальмг улсиг Сиврт нүүлһсн һашута өөнд нерәдгдсн керг-үүлдврмүд болжана
Эн жил хальмг улсиг күчәр Сиврт нүүлһснә далн жилин һашута өөн күцжәнә. Эн өөнд нерәдгдсн керг-үүлдврмүд танһчин цуг райодт болжана. Элст балһснд Амр Санана нертә келн-улсин библиотект номин болн дамшлтын конференц болв.
Елена Бадмаевна Кускеева Сиврт төрв. Энүнә ик өрк-бүл талдан хальмгудла әдл дөчн һурвдгч жилд күчәр киитн һазрт нүүлһгдв. Хол һазрт ээжнь, аавнь, эк-эцкнь, ахнр-дүүнрнь ут-тоодан арвн тавн күн цаажла харһв. Эднәс тәвн нәәмдгч жилд зуг өрхлнь төрскн һазртан хәрж ирв гиж Елена Бадмаевна келнә. Эннь Елена Кускееван өөрхн улст болн цуг хальмгудт хамгин күнд-түрү цаг болв. Тер цагт әмтн харһнад, даарад көрәд бүкл өрк-бүләрн хордг бәәсмн.
Аршань-Зельмн селәнә школын туужин багш Елена Кускееван келсәр, цаажла харһад ик зовлнг үзж. Энүнә эк-эцк бас цаажлгдад, сәәһән хәәв. Тер жилмүд хальмг улс энүнә өрк-бүлд, энүнә селәнә улст ик күнд цаг болв. Кедү күн әмнәсн хаһцсн болх? Кедү күн күзүцә зовлнг дааһад ирсн болх? Экнь Сиврт өнгрж, эк угаһар өсж. Эннь хальмг улсин болн энүнә һашута цаг болв.
Номин дамшлтын конференцд орлцсн улсас ик зунь цаажла харһад ик зовлнг дааж һарсмн. Танһчин булнг болһнас туужин, хальмг келнә багшнр болн дошкольн учрежденьсин көдләчнр цуглрад, цаажла харһулгдсн цагин тускар болн нерән цеврдүлснә хөөн келн-улсиннь танһчан босхж авсна тускар күүндв.
Туужин багш Светлана Тугусован келсәр, өдгә цагин баһчуд эн төрәр соньмсад, зәрмнь шинжлт кежәнә. Элст балһсна хөрдгч тойгта школын, Комсомольск селәнә гимназин болн Садовое селәнә школын сурһульчнр хамдан декабрин хөрн нәәмнд Шар тасм нерәдлһтә керг-үүлдвр күцәнә. Энүг баһчуд Сиврт мөнкинд ясан үлдәсн услин санлд нерәднә, киитн Сиврт күзүцә зовлнг дааһад ирсн улт нерәдж давулна.
Элст балһсна хөрдгч школын туужин багш Светлана Тугусован келсәр, ода эн төрәр зуг һанцхн хальмг улс соньмсжахш. Эднә школд сурчах талдан келн-улсин элчнр, тер тоод орсмуд, Кавказин келн-улс эн төрәр соньмсжана. Эннь зуг хальмг улсин һашута тууж биш, эннь цуг Әрәсән һашута цаг болжана.
Хальмгин государственн университетин номин көдләчнр, келн-улсин архивин элчнр, РИПКРО-н болн школмудын багшнр эврәннь докладмудтан үйәс үй күртл тер һашута жилмүд хальмг улсин санлд мөнкинд үлдв гиж темдглв. Далн жил давсн бийнь, хальмг улсин һашута туужин халх күн болһн ик чинр зүүжәнә.
Баира Петрова, Котина Валерий
