Хальмг Танһчин дотр-дундын министерствин әнгүдин хоорнд һар бәрлдж ноолдлһна турнир давв

Элст балһснд Хальмг Танһчин дотр-дундын министерствин әнгүдин хоорнд һар бәрлдж ноолдлһна турнир давв. Эн турнир цергә даалһвран күцәсн полицин ах лейтенант Немәш Беркасиновин санлд нерәдгдсн билә.

Цергә даалһвран күцәһәд әмнәсн хаһцсн полицин ах лейтенант Немәш Беркасиновин санлд нерәдгдсн һар бәрлдж ноолдлһна турнир билә арвн һар жил давжана. Хойр минһдгч жилд МВД-н көдләчнлә хамдан Немәш Беркасинов Чеченск республикд даалһвран күцәһәв йовсн билә. Баатр зөрмгән үзүләд үүрмүдән харсад әмнәсн харһцв — гиж эн көвүнә экц Владимир Беркасинов келж өгв.

Владимир Беркасиновин келсәр көвүн йир чанһ чиирг, көдлмшч билә. Парашютн спортар соньмсдад, һурвгч разрядта болв. Интститутд сурһуль сурхларн һар бәрлдж ноолдлданд орлцдг билә.

Хальмг Танһчин дотр дундын министрин дарук Николай Манжиков Турнирин орлцачнрла мендләд халун бүлән үгмүдәр Немәш Беркасиновин санлыг тодлв.

Эндр өдр мана дорас өсч йовх баһчуд Немәш Беркасинов кевтә чанһ чиирг зөргтә болж, дангин эн көвүнәс үлгүр авх зөвтә. Цергә даалһвран күцәсн саамд Немәш Беркасинов хаһржах гранатыг цогцарн хаав. Тегәд эврәннь үүрмүдән харсж чадв-гиж Хальмг Танһчин дотр дундын министрин дарук Николай Манжиков келв.

Эн турнирт ут тоодан арвн негн команд дөрлдв. Команд болһнд нәәхмн чиннүрин категорьт бөкнр орлцв. Турнир хойр девснгәр давв. Негдгч болн хойрдгч девснгд турнирин орлцачнр сән ноолда үзүлв.

Эн турнирт чидлтә спортсменмүд орлцв. Эдн Немәш Беркасинов кевтә залу зөрмгән үзүлжәнә. Тогтсн авьясар турнирин чилгчәр авсн цуг белгүдән мөнгнә мөрәһән полицын көдләчнр Немәш Беркасиновин өрк бүлд өгв.

Ээнән Дельгр, Очра Сергей