Хальмг танһчд ода хамгин кимд байрин ширә белдж болх
Росстатын зәнглсәр, Хальмг танһчд ода хамгин кимд байрин ширә белдж болх. Үлгүрнь, шин жилд Әрәсәд дундлад, һурвн минһн жирн арслнгар хот-хол белдж болжана. Эннь давсн жиллә дүнцүлхлә, эн кемжән зурһан процентд ик болжана. Иим кемжән эн жил һурвн бөдүн болн нег үртә өрк-бүлин төлә шин жилин байрт хот-хол хулдж авлһна хамгин бичкн үн тоолж авгдсмн. Тегәд эн жил шин жилин байрт хамгин кимдәр хойр минһн тавн зун дөчн арслнгар хальмг танһчин улс хот-хол хулдж авч чадх.
Лидия Терновая шин жилин байриг эврәннь үрдүдтәһән болн ачнр-зеенртәһән тосхар седжәнә. Энүнә төлә цуг кергтә хот-хол хулдад авчкв гиж эн келнә. байрин ширәд хамгин дурта хот-хол гиж нуһсна мах хулдж авч. Тер мет олн-зүсн ноһамл болн талдан чигн амтта шимтә хот белдх. Лидия Терновая келсәр, эднә өрк-бүлд шин жилин байр хамгин дурта болн сергмжтә байр болжана. Тегәд энүнд белдхин төлә мөнг әрвлжәхш. Лидия Терновая келсәр, ода хөрн минһн арслнг һарв, тер тоод хот-хол хулдж авлһнд, үрдүдтән болн ачнр-зеенртән белг, хувц-хунр хулдж авсн бәәнә.
Росстатын то-дигәр, эн жил мана орн-нутгин регионмудт үн әдл биш. Москва балһсна улст шин жилин байрт хот-хол белдлһнә төлә һурвн минһн долан зун найн арлснг һарх, Санкт-Петербург балһсна әмтнд — һурвн минһн зун һучн негн арслнг кергтә, хамгин ик мөнг — тавн минһн һурн зун жирн арслнг Чукотск автономн округин улс һарһхмн. Хальмг танһчд болхла, шин жилд хот-хол хулдж авхин төлә хойр минһн дундур минһн арслнг кергтә болх. Болв өрк-бүл болһнд мөнгнә кемжән әдл биш. Эн туст өрк-бүлин хазн болн ямаран хот-хоолд әмтн дуртань бас тоод авгдна. Күсдундур минһн арслнг һарв. Тавн минһн арслнгас үлү мөнгн кергтә болв.
Шин жилин байрт кедү мөнгнь һархин туск тооца кехләрн, статистикин көдләчнр, байрин ширә эргж һурвн бөдүн күн болн нег үрнь суух, нег үлү эдн ээжән гиичд дуудх гиж тоолв. Дунд статистикин хот-хоолын тоод заһсн, башлг, кампадь, өдмг, хаяр болн адамч орв. Тер мет эн спискд зурһан зун грамм давслсн темсн, зер-земш болн торт оржана. Дәкәд болхла нег шил әрк, нег шил шампанск болн нег лиитр земшин шүүсн бас орх.
Татьяна Дмитриева, Колдан Церн
