Хальмг танһчд көдлмш уга улст дөн болдг программ мөнгәр региональн хазнас теткгдх
Ода улсиг көдлмшәр тетклһнә халхар Хальмг танһч Әрәсәд эн халхар хамгин күнд бәәдл тогтсн арвн регион тоод йовна. Росстатын то-дигәр, ода мана танһчд көдлмш уга улсин то арвн хойр шаху процент тогтажана. Иим күнд бәәдл чиклхин төлә олн программ үүлджәнә, тер тоод баһ бизнес болн иим әмтн эврә кергән секхин туст шишлнг программ бәәнә. Болв эн жиләс авн әмтиг көдлмшәр тетклһнә керг-үүлдврмүд зуг региональн хазнас мөнгәр теткгдхмн.
Хальмг танһчд баһ бизнесиг болн көдлмш уга улсиг дөнжәх программ хойр минһн йисдгч жиләс авн көдлжәнә. hурвн жилин эргцд мана танһчин дөрвн минһн күн эврәннь кергән эклж чадв. Тер тоод Яшкульск района Коршаевихна өрк-бүлд иим программ нөкд болв. Эдн государственн дөнцл мөнгәр эврәннь парикмахерск салон секж чадв. Церн парикмахерин эрдмтә, Людмила авальнь маникюрин болн педикюрин эрдмч. Людмила Коршаеван келсәр, бидн Москва балһснд көдлсн биләвидн. Эврәннь танһчдан кергән секх санан билә. Зуг түрүн авгтан иим керг күцәхд күнд болда бәәв. Болв шанга дөн авад, невчк амр болв.
Улсиг көдлмшәр тетклһнә агентствас Церн болн Людмила эврәннь кергән секхин төлә зун хөрн минһн арслнг авла. Тер мет эврәннь мөнгән бас һарһх кергтә болв. Эднә салон нег жил хооран секгдв. Тер бйинь иим ахр болхгт нааран олн әмтн ирдг болв. Болв Коршаевихн цаарандан чигн эврәннь кергән делгрүлх саната. Церн Коршаевин келсәр, ода деерән ору орж иржәнә. Тер бийнь дәкәд нег көдләчиг көдлмшт орулж авад, көдлмшән икдулх зура бәәнә.
Иим кевәр эдн көдлхлә, Коршаевихна өрк-бүлд федеральн бюджетас дәкәд тәвн нәәмн минһн арслнг өггдх. Әрәсән заканд орулгдсн сольврас иштә, иим дөн шанг эврәннь кергән иим программар сексн улст күргжәнә. Нег үлү, шинәс сексн көдлмшин нег ормин төлә деернь немр мөнг өгхмн. Хальмг танһчин улсиг көдлмшәр тетклһнә агентствин ахалчин дарук Эльза Нахатинован келсәр, Әрәсән заканд ирлцнһү сольвр орулгдв. Иим программ ода ман орн-нутгт сәәнәр күцәгджәнә. Тер мет региональн халхас бас дөн күрггдх.
Эн жиләс авн көдлмш уга улст региональн бюджет нөкд болх зөвтә. Тегәд иим программ урдк жилмүдлә әдл сәәнәр күцәгдхнь цаг медх.
Пихона Нина, Очра Сергей
