Хальмг танһчд эпидемиологическ цаг эклснәс авн ОРВИ гемәр гемтсн 5 минһн йовдл темдглгдсн бәәнә

Хальмг танһчд эпидемиологическ цаг эклснәс авн ОРВИ гемәр гемтсн тавн минһн йовдл темдглгдсн бәәнә. Олн-әмтнд тәрлһ тәвлһн эндр өдр төгсв. Энүнә кергт хальмгт «Гриппол плюс» нертә тәвн зурһан дундур доз болн жирн зурһан минһн «Гриппол» нертә доз вакцин авч иргдсмн.

Эндр өдр хальмгт грипп гемм икәр тархагджана гиж келж болшго. ОРВИ-гемәр гемтсн улсин то невчк икдсн бәәнә. Энүнд әәмшгтә юмн уга гиж специалистнр тоолжана. Роспотребнадзорин региональн церглт зәнглсәр, 2012-201З-гч жилмүдт грипп гемм урдк жилмүдлә әдл тархагдхмн. Тегәд һоолгч керг-үүлдврин негнь профилактическ эв-арһ болжана. Энүнә тускар Хальмг танһчар бәәх Роспотребнадзорин заллтин эпидемилогическ әнгин специалист Очир Хечиев цәәлһв.

Ода деерән хотл балһснд эн халхар бәәдл му биш. Балһсна медучрежденя көдләчнр гемм тархагддг сезонд белн бәәнә. Аптек болһнд кергтә эм, талдан чигн тоот олж болхмн.

Олн-улсиг тәрлһнд оруллһн гемм тархагдхт харш болад, олн-зүсн инфекцас гетлгх арһ өгхмн — гиж Элст балһна поликлиникин эмнлһнә халхар бәәх ах эмчин дарук Кема Чужаева келнә.

Элст балһсна бичкдүдин садмудар болн школмудар бичкдүдт тәрлһ тәвлһн бас төгсв. Тәрлһ тәвлһиг дурушажах улс уга, зуг аллергий гемтә зәрм улс тәрлһ авч чадсн уга. Энүнә учрнь ил медгджәнә.

Балһсна «Сар-Герл» нертә 28-гч тойгта бичкдүдин садын ах медицинск эгч Людмила Халгаева келсәр, эднә бичкдүдин садт хойр зун арвн нәәмн доз тәрлһн һарһгдж өггдсмн. Энд иржәх бичкдүд цуһар тәрлһ авсн бәәнә. Садт шинәр ирсн бчкдүд болхла юалһсна поликликинд тәрлһ авсн болдг.

Эрүл-менд күн болһн профилактическ эв-арһд орж, эмчнрәс сүв-селвг сонсч цагларн тәрлһ авлһн өдгә цагин һоллгчин негнь гиж эмчнр тоолжана.

Бевина Мергн, Колдан Церн