Хаалһст зеткрин учрар әмнәсн хаһцсн улсин санл тодлдг өдр болв

Ноябрин һурвдгч нарн өдр хаалһд учрсн зеткртә йовдлын ашт әмнәсн хаһцсн улсин санлын нарта-делкән өдр темдглгднә. Хальмг танһчд эн өдр шишлнг керг-үүлдвр бүрдәгдв. Хаалһст зеткрин учрар әмнәсн хаһцсн улсин санл тодлдг өдр болжана. Эн өдр иим учрар өнгрсн улсин өрк-бүлмүдт һундл төрж, хаалһар әәмшг угаһар йовлһиг государств теткхин тускар дәкәд нег тодлулжах өдр гиж тоолгдна.

Эн өдр нарт орчлнд деер бәәх цуг әмтн хаалһд зеткрлә харһсн улсин санлынь тодлв. Сүл жилмүдт тиим седклтә йовдлмуд икдж йовна. Хамгин түрүнд хаалһд учрсн йодлмудын ашт бичкдүд әмнәсн хаһцна. Эндр өдр эн төриг хаһлхин төлә кесг зака болн социальн программ бүрдәгдсн бәәнә. Болв статисттикин то диг олн улсиг үүмүлжәнә.

Специалистнрин ухан тоолврар эндр өдр ик зуудан хаалһ һатлсн улсин учрар зеткртә йовдл һарна. Өдр болһн әмтн кергтә һазрт хаалһ һатлжахш, энүнхс зеткртә йовдлмуд икгднә. Дәкәд болхла хаалһин девскр му бәәдлд туусн бәәнә. Балһсна цутхлнг уульнцст дала машид өрүн болн асхни цагт йовна.

ГИБДДн инспектор Жамбин Евгений келсәр жил болһн мана хаалһст кесг бичкдүд хорна. Бичкдүд хаалһ һатлсн кемлә оньган өгхш. Эк эцкнр болн школын багшнр эн туст ик көдлмш давулх зөвтә.

Эн керг үүлдврт баһ наста инспектормуд бас орлцсн билә. Эдн маши залачнрт хаалһин зокал медхә гисн цаасн өгүлв. Маши залачнрин ухан тоолврар эндр өдр хаалһд ик зуудан бичкдүд болн баһ наста улс хорна.

Мана школд инспектормүдин баг бәәнә. Эн багд бидн хаалһин зокал даснавидн, дәкәд хаалһд яһж бийән бәрх кергтә меднәвидн гиж маднд баһ наста инспектор келж өгв.

Эндр өдр хаалһд зеткртә йовдлмуд баһрулхин төлә маши залачнр оньган өгч маши залх зөвтә, бичкдүд болн бөдүн улс хаалһ һатлхларн онтган өгч һатлх зөвтә. Энүнә ашт зеткртә йодлмуд хаалһд невчкн баһ болх.

Гольдина Ирина, Валерий Котинов