Хаалһар әәмшг угаһар йовлһна тускар селвлцән болв
Хальмг танһчин хаалһсар әәмшг угаһар йовлһна туст ямаран бәәдл тогтв? Статистикин то-дигәр, жил ирвәс хаалһст зеткртә йовдлмудын то өсәд йовна. Энүнәс көлтә шавтсн болн әмнәсн хаһцсн улсин то бас ик. Сүл цагт әмтиг машид дәврдг йовдлмудын то бас өсжәнә. Эн туст нурһлж хаалһар йовлһна зокал эвдсн маши залачнр гемтә болж һарна.
Танһчин правительсьтвин ахлачин негдгч дарук Вячеслав Илюмжинов хаалһд әәмшг уга бәәдл теткдг ведомствин ГИБДД-н, МВД-н болн мэрийн һарадчнр чанһар шоодв. лайф Илюмжиновин келсәр, давсн жилд ирлцнһү ведомствс тас көдлмшән кесн уга бәәдлтә. Иигж көдлж болшго.
Хаалһст зеткртә йовдлмудын болн энүнәс көлтә әмнәсн хаһцсн улсин тускар танһчин толһачд өгсн то-диг хажһр гиж ГИБДД-н инспектормуд хөөннь зәнглв. Өмн үзгин федеральн округин һурвн субьектла көдлжәх госинспекц һурвн региона тускар то-диг орулж өгч. Тегәд чигн иим то-диг алнг болв. Вячеслав Илюмжиновин келсәр, статистикин то-дигд иим ик өслт болх зөв уга. Эннь хажһр.
Тер бийнь эн халхар күнд бәәдл тогтв. Вице-премьерин келсәр, Элст балһснд Газельмуд дегд түргәр гүүлгнә, салонд дегд шуугата көгжм тәвнә, маршрутар йовлһна диг-даран уга. Элстин захд бәәх улс арһ уга таксиһар йовжана. Ода Элстин һарадчнрт далн эрлһн орж ирв. Мэрийн ахлачин дарукин үүлд дав зуур даажах Борис Лиджиевин келсәр, әмтн зөөдг зокал эвдсн арһлачнрин нердиг Элстин панорама газетд барлхвидн. Хөөннь иим зәнг арһлачнр әмт зөөх марһанд орлцхла тоод авгдх. Илюмжиновин келсәр, эн туст бәәдл чиклгдх зөвтә. Кезә бидн эн халхар диг-даран бәәнә гиж келж чадхмб?
Вице-премьерин сурврт күн хәрү өгч чадсн уга. Эднә ормд Элст балһсна бәәрн улс хәрү өгв. Эн күүкд күүнә келсәр, эн халхар бәәдл тас сольгдсн уга. Би инвалид. Нүднә харан му. Маршурткс дегд хурдар гүүлгәд, әәмшгтә болна.
Эн төрәр зүткәтә күүндвр һарв. Элстин һардачнр ГИБДД-н көдләчнриг гемшәнә. Тедн болхла ирлцнһү тогтавр батлж авчахш гиж хотл балһсна һардвриг гемннә. ГИБДД-н ахалчин дарук Галимджан Нурнахамбетовин келсәр, кергтә закан уга. Кемр жолачнр машиһан газонд тәвхлә, энүг засгла харһулж болхш.
Энүнә хөөн селвлцәнә орлцачнр бәәрн медлд бәәх хаалһ тер тоод Садовое — Баһ Дөврд хоорндк хаалһ яһж ясж шинрүлхин тускар күүндв. Ик Царнг селәнд күрдг хаалһд шишлнг темдгдүд тәвх кергтә. Эс гиж му чинртә хаалһ үзүлжәх темдг кергтә. танһчин тосхлтын, көлгн-күчнә болн хаалһин эдл-ахун министрин дарук Василйи шамрай келсәр, цуг танһчар иим темдгүд кехлә, һучн сай арслнг кергтә. Министерствин бюджет болхла зуг хөрн нәәмн сай арслнг тогтажана. Яшалтинск района ахлач Николай Рерих келсәр, эднә район хойр-һурвн зун гектарас буудя эс хураж авсинь күн медшго. Болв хаалһ эс ясхла күн болһн үзнә. Нег үлү, Ростовск областяс йовж йовсн “ГАЗель” көмрсн билә. Энүнд бичкдүд йовла. Иим бәәдл кен чиклхмн. Ясврин мөнгн эс сурж авсн улс гемтә болх.
Колдан Наталья, Колдан Церн
