Городовиковск районд эн зунар буудян урһц му болв
Зунын кемд ик халун болад, урһц үрснәс көлтә Әрәсән талдан регионмудла әдл Хальмг танһч шангас дөн күләжәнә. Хальмгин селәнә эдл-ахун министерствин зәнглсәр, эн жил ут-тоодан зун хөрн минһн гектарт тәрән үрв. Городовиковск район эн зунар давсн жиллә дүнцүлхлә, буудян кемжәг хойр холванд баһар цокж авв.
Урһаж авсн буудя ГОСТ-ын кемжәнлә илцжәнә. Зун эн жил урһц баһ болв гиж “Пролетарская победа” СПК-н директор Анатлий сарычев һундлтаһар келнә. Энүнә келсәр, намрар тәрсн тәрән тенгрин аюл дааж чадсн уга. Үвләр дөчн градус киитн болв, хаврин болн зунын кемд хур цаглань орсн уга. Тегәд чигн эн жил буудя хураж авлһна көдлмш ахр болзгт кегдв. Цокж авсн буудяг тер дарунь хуваһад түгәж өггдв. Хамгин түрүнд эдл-ахун пай авсн көдләчнрт өггдв. Ода энд долан зун күн бәәнә. “Пролетарская победа” СПК-н директор Анатолий Сарычевин келсәр, ут-тоодан хойр минһн тавн зун тонн буудяг көдләчнрт түгәж өгв. Үлдсн бууядг иргч тәрәнд экн гиж үлдәв.
Тегәд хулдхд тас юмн үлдсн уга, зуг хойр дундур минһн тонн хүлдх арһ бәәнә. Сарычевин келсәр, эн жил буудян хулдж авх улс мөнгән әрвлжәхш. Ода нег килограмм буудя нәәмн арслнг күрчәнә. Кемр байн урһц хураж асн болхла, эн жмил сән ору авх бәәсмн. Нег үлү, хаврин кемд тәрәнә көдлмшт шанг дөн болсн билә. СПК-н директор Анатолий Сарычевин келсәр, государств тосн түлә хулдж авхд льготн үн тогтав, химин эв-арһ олзхд бас нөкд болсмн.
Тер мет иим күнд бәәдл Городовиковск района талдан чигн эдл-ахуст тогтв. Давсн жиллә дүнцүлхлә, хамгин олар бүүдя хураж авдг районэн жил буудян урһциг хойр холванд баһар цокж авч. Нидн жил бас хагсу зун болн билә. Эн жил болхла ут-турштан дөчн минһн тонн буудя хураж авгдв. Эн зунар дигтә урһц хураж авлһна кемд бачм чинртә бәәдл зарлгдв. Тенгрин аюлас кедү һару һарсинь тоолад һарһв. Ода деерәс данцалһна мөнг күлжәнә. Городовиковск района АПК-н заллтин ахлач Григорий Михайловин келсәр, иим күнд бәәдл урднь энд тогтсн уга билә. Ут-тоодан хойр минһн зурһан зун гектар үрж одв. Эннь арвн нәәмн сай арслнг һару болж һарчана.
Уд луга района механизатормуд талдан урһц хураж авх. Энд бас түрү бәәдл тогтв. Зунын кемд хур эс орснас көлтә нарн цецгин урһц бас му болв. СПК-н директор Сарычевин келсәр, ода эн культур хәләтн. ода ясн болх зөвтә. кемр хур эс орхла, цааранднь урһмл өсшго. Ода болхла тас хур оржахш.
Кемр хур элвгәр орхла, нарн цецгин урһц гем уга сән болх бәәдлтә. Нидн жилин күцәмж бәрх арһ учрх. Давсн жилд гектар болһнас арвн центнер ясн хураж авгдла.
Чучян Валентина, Ирчин Алексей
