“Голос нации” нер Конго орн-нутгас ирсн оют зүүв
Хальмгин университетин оют Армель Мбуи “Голос нации” нер зүүв. Элст балһснд дуучнрин марһан товчлгч девснг болв. Энүнд арвн һурвн көвүн-күүкн орлцв. Дәкәд нег тодлад келхлә, марһан һурвн девснгәр болв. Диилвр бәрсн оют Армель Мбуи Конго орн-нутгас Хальмгт ирж деед сурһуль дасжана. Товчлгч девснгд билгтә дууч францин келәр ду дуулв.
Государственн концертн залд марһана орлцачнр “Бони М” багин, Лары Фабиан, Шакиран, Муслим Магомаевин дуулж йовсн дуд дуулв. Дууна дөрлдәнд оютнрла хамдан сурһульчнр бас чидлән өсрв. Ик-Буурл селәнә школын арвдгч классин сурһульч Марина Балтыкова монһл улсин ду дуулв.
Оютн Данара Манжикова марһанд эрк биш диилвр бәрхәр зүтксн уга, иим ик чинртә керг-үүлдврт орлцснь бас ончта йовдл болв. Данаран келсәр, дөрлдәнд орлцанр цугтан өөрхн таньлдад, нәәжнр болв. Тегәд марһан хамцу концерт болж энүнд медгдв. Марһна йовудт сурһульчнр сонбн ду дуулв. Тер тоод Элстин классическ гимназин сурһульч Бат Манхаевиг зааж болх.
Марһанд орлцсн көвүд-күүкд Әрәсән болн һазадын ордудын эстрадын олн таасгдсн ду дуулв. Дөрлдәнә жюрид диилчәиг йилһж авхд күнд болв. Билгтә көвүд-күүкд цугтан сән белдвр үзүлв. Зүткәтә марһана ашт жюрин шиидврәр, Голос нации нер Хальмгин университетин негдгч курсын оют Армель Мбуи зүүв. Эн көвүн Конго орн-нутгас ирж. Экономикин эрдм дасжана. Марһана товчлгч девснгд Джо Дассена “Если бы не было тебя” нертә ду францин келәр дуулв. “Голос нации” нертә марһана диилчә Армель Мбуи келсәр, олнд таасгднс францин ду дуулх дурн күрв. Энүнд йир дурта. Иим олн улсин өмн дуулхд байрта болв. Тегәд диилвр бәрхәр зүткв.
Марһанд орлцсн көвүд-күүкдт диплом, үнтә мөрә, тер тоод фотовидеокамер, мөнгнә мөрә бәрүлж өгв. Дөрлдәнә дииләч Армель Мбуи болн хойрдгч-һурвдгч девснгин лауреатнрт Гиляна Коноковад болн Альбина Ибрагимовад ирлцнһү дараһар һучн, хөрн болн арвн минһн арслнг мөрә бәрүлж өггдв.
Шаран Баира, Котина Валерий
