Гирь өрглһнә марһан Элстд болв
Элст балһснд залу болн күүкд улс дунд гирь өрглһнә спортар секәтә марһан болв. Дөрлдән күнд атлетикин болн пауэрлифтингин танһчин бичкдүдин спортын школын арвн жилин өөнд нерәдж давулгдв. Энүнд Элст балһсна, танһчин райодын, Волгоград болн Әәдрхн балһсдын спортсменмүд орлцв. Ут-тоодан зун һар күн чидлән сөрв. Марһана дииләчнр дипломар болн медальмудар ачлгдв.
Түрүн болж дөрлдәнд арвн негн наста болн энүнәс бичкн сурһульчнр орлцв. Эн насни багд Астраханск областин элч Данил Роганов түрүн орм эзлв. Нәәмн килограммин хойр гириг эн көвүн зун найн дөрвн дәкж өргв. Тер мет нәәмн килограммин хойр гириг Данил хйор зун тәвн зурһа дәкж түлкж яадв. Энүнлә дөрвдгч классин сурһульч Мураджан Муратов дөрлдв. Мураджан аштнь хорйдгч орм эзлв. Ут-тоодан хойр дәкж гирь өргәд, һурвн зун зурһан очко хоршав. Түрүн даслтд зун найн йис дәкж гирь өргж. Эннь энүнә онц рекорд болв. Мураджан Муратовин келсәр, гирь өргхд амр биш. Чикәр әмсхл авх кергтә. Өрүн болһн гүүх кергтә, дамшлтан өөдлүлхлә сән болна.
Ут-тоодан марһанд зун бичкн спортсмен орлцв. Тер тоод күүкд бас чидлән сөрв. Эдн залу улсиг дураһад иим күнд спортар соньмсжана. Гирь өрглһнж амр биш спорт. Тегәд бичкн күүкд гимнастикин эс гиж гиигн атлетикин ормд гирь өрглһнә спорт шүүж авснь алнг болад бәәв. Тер бийнь күүкд иим спорт шүүж авсндан байрта бәәнә. Кичәлд дутлаго одх кергтә, иим спорт йир таасгджана. Түрүн болж иим марһанд орлцжана. Тегәд күнд болв. Эврәннь хөрн һурвдчг школын нер харсхар дөрлджәнә.
Дөрлдәнә бүрдәһәчнрин келсәр, жил ирәвс иим марһанл орлцх бичкдүдин то өсәд йовна. Дөрлдәнд белдвр кесн цагт эдн тохнята көдлмш кеж, ик дааврта болна, нег-негндән нөкд болна. Юнгад гихлә спортсмен болһнас командын күцәмж тогтна. Кичәл болһн эдн программиг күндрүләд, шин элемент ухалж орулна, көгжм бас шүүж авна. Цуг эн тоот бчикдүдин үүдәлтин ухан-сана делгрүлһнд сән нилчән күргнә, тәвсн күцлдән эрк биш күрх сурһмж дасхна. Хальмг танһчин гирин спортын федерацин президент Баснг Эдеевин келсәр, хамгин түрүнд ик теслт кергтә, чанһ-чиирг болх зөвтә. Күндиг дааһад һархла, сән үзмж ирх. Күүнә эрүл-мендин халхд гирь өрглһн сән нилчән күргнә. Гирь өргдг спортсмпнмүд теслттә болна, уурлад бизһлхш.
Зүткәтә марһана ашт командн тоод Көтчнрә района Көглт селәнә команд түрүн орм эзлв, хойрдгч орм Астраханск облатсин элчнр эзлв, һурвдгч ормд Элст балһсна хөрдгч школын сурһульчнр һарв. Дөрлдәнә дииләчнр күндлһнә һашгар болн медальмудар ачлгдв.
Ээнән Делгр, Колдан Церн
