Эзнә бичкдүдин садмуд секгдх
Хальмг танһчд эзнә бичкдүдин садмуд государственн болн эзнә нөкцлтин программар бүрдәгдх. Энүнә тускар танһчин правительствин ахлач Игорь Зотовин һардврта көдлмшч селвлцәнд келгдв. Хальмг танһчин һардврин тоолврар, иим кевәр дошкольн сурһулин төрмүд хаһлгдх зөвтә. Эзнә бичкдүдин садмуд дошкольн учрежденьд тогтсн чеерүдиг баһрулх зөвтә. Тер мет иим садмудт цуг улс бичкдүдән орулж өгх арһ бүрдәх кергтә. Тер тоод эднә үнин кемжән дегд ик болх зөв уга. Эн халхла залһлдата көдлжәх арһлачнрт ЖКХ-н мөнгн өглһнә төлә государств данцалһна мөнг өггдх. Тер мет алвна льгот бас кегдх. Эндр өдрт ирлцнһү ведомствс зәрм категорин услин төзлә алвна кемжә тогталһна заканд сольвр орулх зокал белдв. Дәкәд болхла сүүрин йовудт танһчин сангас бичкдүдин садмудын төлә гермүд йилһж өгх төр хәләгдв.
