Ергенинский селәнд мөрдин урлдан болв
Көтчнрә района Ергенинский селәнд болсн мөрдин урлданд диилчәнр йилһрв. Марһана һол мөрә Нива автомобиль хөрн дуунда диилвр бәрсн спортсмен шүүж авв.
Ке-сәәхн мөрд дор ормдан зогсж чадлго, тавлад бәәв. Иим ик марһанд орлцад эдн дасчкв. Марһана өмн спортсмен болһн эврәннь мөрнләһән үлдәд, сүл селвг авда, диилвр бәрхд бийән белднә. Эн саамд урлданд цевр цуста болн хальмгин тохма найн дөрвн мөрн орлцв. Түрүн урлдан эклв. Ергенинский селәнә элч Һәрә Шавлинов нег минһн хойр зун метр дистанциг хамгин түрүнд һарч ирв. Келхд, давсн жилд энүнә унсн ажрһ бас негдгч орм эзлсн билә. Диилвр бәрәд дасчкв гиж эзнь келнә. Диилвр бәрсн Һәрә Шавлиновин келсәр, эврәннь мөрндән зун процентд иткв. Тренер сәәнәр мөр белдж мөрн бас сәәнәр урлдв.
Марһана ойвудт мөрд олн-зүсн эв-арһар гүүдгән үзүлв. Урлдан болһн дииләчнр йилһрв. Мөрдин урлдан ке-сәәхн марһан болсн деерән, диилвр бәрх шунлт өгнә гиж мөрдин урлда ирж хәләсн улс келнә. Эн марһанд танһчин болн хам-хоша бәәх регионмудын хамгин сән гисн мөрд орлцв. Ергенинский СПК-н һардач Лев Санджиевин келсәр, жил ирвәс нааран ирдг гиичнрин то өсәд йовна. Тер мет мөрнә урлданд орлцдг спортсменмүдин то бас икджәнә. Иим келн-улсин спортыг цаарандан делгрүлх кергтә болжана.
Лев Санджиевин келсәр, майин нег шинд болдг мөрдин урлдан уул өвкнрин авьяс сергәж босхлһн болжана. Кезәнк цагт көвүдиг һурвн настаһаснь авн мөр унулдг бәәсмн. Хуучн домгар мөрн хальмг күүнд һурвн үнтә зөөрин негнь болжана. Нимя Шерахтеевин тоолврар, иим байр хальмг улсин бәәцин зангшал сәәнәр медж авхд сән нилчән күргнә. Хаврин у-өргн тег, ишкә гермүд, мөрдин адун, домбрин ә — цуг эн тоот хальмг улсин бәәцин авьяс болжана.
Нимя Шерахтеевин келсәр, ода марһанд олн һазрас әмтн ирдг болв. Энүнд Дагестана, Чечнян, Ростовск областин, Казахстана элчнр ирж дөрлднә. Хальмг улст мөрнә урлдан уул авьяс зангшал болжана. Эннь мана цусн махнд шингрж одсн авьяс болжана.
Кен һол мөрә шүүж авх гиж урлда хәләсн улс алмацад бәәв. Эннь сүл урлдан болсн хөөн медгдв. Хөрн дуунда болсн урлданд зуг сүл зун метрт дииләч йилһрв. Резон нертә кер ажрһ нүүрт һарв. Энүнә эзнь Шин мер поселкин элч Дорж Давинов мөрн унсн спортсменла хамдан күндлһнә дунһра эргәд йовв. Дииләч Дорж Давиновин келсәр, эн жил урлдан сән спортсменмүд орлцв. Хойр жилдән диилвр бәржәән. Һурвн маши шүүж авч.
Ергенинский поселкин улсин келсәр, мөрнә урлдан сүл цагт ик чинртә марһанд хүврв. Энүнд диилвр бәрсн әмтн үнтә мөрә тер тоод мотоцикл, холодильник, телевизор болн талдан чигн үнтә мөрә шүүж авна. Эн саамд марһан хамгин сән спортсменмүд бас үнтә мөрәһәр ачлгдв.
Ээнән Ольга, Колдан Церн
