Эндр Теегин йосна бичгин сән өдр

Эндр теегин йосна бичгин өдр. Нег минһн йисн зун йирн дөрвдгч жилин апрелин тавн Хальмгин һол закан —Теегин йосна бичг батлж авгдсмн. Шин закан демократическ шинрлт келһнә эклц болв, танһчин олна болн политическ бәәдл-жирһлин зөвин ул болв. Танһчин һол закан зөвин аһуд ни-негн болн төвкнүн кевәр бәәлһнә бәәдл теткжәнә. Теегин йосна бичг батлж авлһна нег жил өмн йирн һурвдгч жилд далн зурһадгч жилин Әрәсән Конституц олна дууһар шин һол заканд сольгдв. Әрәсән регионмудт һол закаһан бас шинрүлх кергтә болв. Арвн йисн жилин эргцд Теегин йосна бичгд кесг сольвр орулгдад, энүнә чинрнь өргн болв. Цаг нег ормдан бәәхш. Ода танһчин хамгин өөдән цолиг президент гиж нерәдлго, танһчин толһач гиж келдг болв. Тер мет многопартийность гисн нерн орулгдв.