Эндр мөшклһнә комитетин көдләчнрин сән өдр
Дигтә хойр жил хооран Әрәсәд зөв-йос харлһна шин орган — мөшклһнә комитет бүрдәгдсмн. Энүнә көдләчнр хамгин әәмшгтә кевәр болн жанһрта зака эвдсн йовдлмуд илткж шинжлх даалһврта. Ода эн структур үлмә уга кевәр үүлдж, зуг Әрәсән президентин медлд бәәнә. Әрәсән комитетин һардач Александр Бастрыкин кеж-күцәсн көддмшин аш диглв. Энүнә темдглсәр, ведомствин көдләчнрин медрл болн бүрдәмжин эв-арһ олзлад, сән күцәмж бәргдв. Дундлад Әрәсәд кү алсн йовдлмудын найн процентнь илткгдв. Хальмгин мөшклһнә комитетин барин церглтин зәнгләср, мана танһчд эн то зун процентд күрв. Давсн жилд долан зун уголовн керг күцәгдв, эднәс һурвн зун дөчн керг зарһд йовулгдв. Хальмг танһчин мөшклһнә заллтд Элст балһсна мөшклһнә әнг хамгин ик әнг болжана. Энүнә көдләчнр зака эвдсн йовдлмудын ик зууһинь илткж шинжлнә.
