Эндр багшнрин нарта-делкән өдр
Эндр мана орн-нутгт багшнрин сән өдр темдглджәнә. Элст балһснд Баснга Баатрин нертә драмин театрин герт багшнрин байрин хург болв. Иим сән өдр мана орн-нутгт жирн тавгдгч жиләс авн октябрин сүл нарн өдр экләд темдглв, йирн дөрвдгч жиләс авн болхла энүг октябрин тавнд цуг нарта-делкәлә әдл темдглдг болв. Ода Хальмг танһчд зурһан минһн багш көдлжәнә, школмудт һучн хойр минһн сурһуль медрл авчана. Тавн зун эрдм-сурһулин багш Хальмг танһчин ачта багшин нер зүүжәнә. Эндрк байрин хургин йовудт дәкәд арвн күн танһчин ачта багшин нер зүүв. Өдгә цагт багшин көдлмш улм жанһрта болв, цагин некврлә ирлцж бичкдүдт медрл өгх кергтә, бәәцин таал чигн ясрулгдхла сән болх. Тер бийнь дурта эрдмән шүүж авсн багшнр цуг арһ-чидлән нөөлго көдлжәнә. багшнрин байрин хургт танһчин толһач Алексей Орлов орлцв.
