Эн өдрмүдт Пальмовин нертә келн-улсин музей йирн жилин өөнән темдглжәнә

Тадн танһчин зәнг шуд эфирт хәләжәнәт. Һарцан цаарандан өгчәнәвидн. Эн өдрмүдт Пальмовин нертә келн-улсин музей йирн жилин өөнән темдглжәнә. Энүг нег минһн йисн зун хөрн негдгч жилин мартын хөрн тавнд сексмн. Энүнд хальмг улсин туужин, сойлын болн искусствин көрнг хадһлгджана. Хальмг теегт музей секлһнд профессормуд Пальмов болн Рыков орлцсмн. Эднә нилчәр археологическ болн этнографическ олн материал цуглулж авгдв. Эдн музейин түрүн коллекц болж һарв. Мана үүдәгч баг музейин көдләчнрин байринь хувалцв.

Эн өдр музейд ирсн әмтн Пальмовин нертә келн-улсин музей бүрдәгдснә ончта байрт орлцв. Музейин көдләчнр документальн фильм үзүлв, өөнин һәәхүл секв, кезәнк цагиг үзүлжәх театральн наад белдж тәвсмн. Цуг эн тоот хальмг теегт түрүн музей секлһиг ил медүлв.

Йирн жилин туршарт хальмгин музейд кесг өвәрц экспонатмуд цуглрв. Эдн мана теегин йиртмжин, археологин, туужин болн сойлын тускар герчлжәнә. Мана танһчин музейд хуучн шаальг мөнг, хатна ке-сәәхн бишмүд болн минь ода цокж авсн зургуд үзж болх. Светлана Оконован тоолврар, олн улст музей ик чинр зүүжәнә. Энүнә нилчәр кесг үйнрин залһлдан тасрхш.

Наарна ирнс улсин тоолврар, музей ончта өөнин байрин өдр шин экспонатмудла өөрхн таньлдж болх. Энүг удл уга музейд тәвх зура бәәнә. Өдгә цагт хальмгин музейд далн минһн экспонта бәәнә. Элстин улсин келсәр, урднь музей Элст балһсна цутхлнгд хуучн уутьхн герт бәәршлжәлә. Энд дәәнә хөөн үлдсн зургуд үзж болх билә.

Байринхургт үг келсн улсин темдглсәр, музейин көдләчнрин көдлмш түрүн хәләцд үзгдхш. Болв сойлын халхд эднә орулжахнь тәвцнь ик чинр зүүжәнә. Эднә нилчәр сойлын болн туужин зөөр иргч үйнр хадһлгджана. Ончта өөнлә ирцүлж олн көдләчнр күндлһнә һашгудар болн белгүдәр ачлгдв.