Эн өдрмүдт Хальмг танһчин аһуд һан халун болжана
Эн өдрмүдт Хальмг танһчин аһуд догшн һан халун өдрмүд болжана. Аһарин дулана кемжән дөчн һурвн градуст күрчәнә. Иим цагт олн әмтн халунас зулад, тенгс тал һарч йовхар зүткнә. Энд үлдсн әмтн халун өдрмүд яһж дааж һархмн?
Эн өдрмүдт һаза һучнас даву градус халун болв чигн, Элст балһсна уульнцд әмтн дала. Зәрм улс көдлмштән адһж йовна, талдан әмтн кергән күцәһәд, халун нарнас әәжәхш. Догшн халун болв чигн әмтн гертән суухш. Зунын халунд әмтнә нөр күрнә, цогц-махмуд өвднә.
Иим кемд күнд болна гиж элстихн келнә. Эмчнрин селвгәр, халунд һаза һархларн толһаһан нарнас халхлх кергтә. Тер мет шүкр олзлхла сән болх. һаза зонт олзлнав, веер бас кергтә болна арһ уга тесх кергтә. Гертәсн һарлго, кондиционерин өөр бәәнәв. Халунд мороженое иднәв. Сүүдрт орад, киитн ус уужанавидн. Блиц 6 халун өдрмүдт каркаде цә уухла сән болна.
Июль сарин халунд медицинск бачм дөн күргдг церглтин көдлмш икднә. Догшн халунд әмтн олар гемтжәнә. Өдр болһн 0З телефоһар олн әмтн жиннүләд дөн сурна. Эн өдрмүдт цусна дарлтнь ик, зүркнә гемтә улс икәр зовжана. Тер мет райодт бәәх әмтн бас күнд таалд бәәнә. Ямаран халун болв чигн, арһ уга кеер һарад селәнә эдл-ахун көдлмш кех кергтә болна. Ода мана танһчд олна малд хот белдлһнә болн буудян урһц хуралһна көдлмш кегджәнә. Кедү халун-һан болв чигн, урһциг цаглань хураж авх даалһвр бәәнә. Нег үлү, хур-чиг баһ болад, урһц мууһар урһв. МЧС-ин региональн заллтин көдләчнрин зәнглсәр, зунын кемд һучн зеткртә йовдл учрв. Хальмг танһчар МЧС-ин ах инспектор Газиз Калиевин келсәр, эндр өдр теегт дөчн дөрвн түүмр шатв. Ут-турштан һучн зурһан гектарин аһуд һал орв. Давсн жилд болхла жирн тавн түүмр кеер шатла, зун жирн һурвн гектарт тег үрв. Иим кемд һалла саг бәәх кергтә, нег үлү жолачнр кеер тәмкән унтраһад хайх зөвтә.
Болв хаулн цагт зәрм әмтн энүнәс ору авчана. Сүл өдрмүдт киитн ус, квас, лимонад болн мороженое әмтн олар хулдж авдг болв. Цанһад цәәж йовсн әмтн ундан хәрүлхин төлә мөнгән әрвлхш. Унд хулдач Элла Имееван келсәр, урднь зуг нег бочк ус хулддг бәәж, ода болхла өдртән хойр-һурвн бочк усн-квас уга болж одна. Тер мет лимонад бас сәәнәр хулдгджана.
Дәкәд болхла кондиционермуд, вентилятормуд болн сплит-систем хулджх әмтн бас ик ору авчана. Ода болхла, электрокүч әрвлдг техник хулдж авч болх. Иим кевәр дөчн процент электрокүч әрвлж болх. Специалистнрин цәәлсәр, иим кеәвр электрокүч әрвлхлә, бәәцин таал му болхш. Зунын кемд электрокүчн икәр олзлгджах цагт гертәсн һархла, герл унтратн, электроприбормуд керг угаһар көдлх зөв уга. Дәкәд болхла электрокүч әрвлдг лампочк олзлхла бас сән болх. Ииим кевәр тавн холванд герл әрвлгднә. Энергетическ компаня барин сегләтр Аксен Хараевин келсәр, ода гер болһнд эздүдин счетчикүд бәәнә. Эннь советин йосна цагт тәвгдсн прибормуд болжана. Ода иим прибормуд хуучрад, улсин олзлсн гер күцц тоолж чаджахш. Эннь һал орх әәмшгтә. Тегәд хууч прибормудын ормд шиниг тәвх кергтә гиж Хараев келнә.
Синоптикүдин тааврар, иргч өдрмүдт серүн болшго. Тегәд зунын халуг дааж һарх кергтә.
Ээнән Делгр, Бадмаран Владислав
