Эн жиләс авн олн үр һарһсн экнриг “Родительская слава” нертә медаляр ачлх

Эн жиләс авн олн үр һарһсн экнриг “Родительская слава” нертә медаляр ачлх, тиим закан Әрәсән Президент Владимир Путин батлсн билә. Приютненск района Үлдчн селәнд бәәх 7 үртә Манджин Жаннад байрин бәәдлд медаль бәрүлж өгв.

Үлдчн селәнд Манджиевихнә өрк бүлиг олн әмтн күндлнә. Манджиевихнә олн үртә өрк бүл Приютненск района болн селәнә бәәдл жирһлд шүнмһа кевәр орлцна. Эн цагин эргцд эднд кесг һашгуд ачлврмүд бәрүлж өгв. Жанна Максимовна бичкдүдин диилврт дангин байрлна.

Кристина болн Иляна экчәс һарсн күүкд. Эк эцкнь хорсна хөөн Жанна Максимовна эдник көвүшлж авсн билә. Герин эзн Эрдюш Барбаевич дурго болсн уга, аваляһан дөннв.

Олн үртә эк Жанна Максимовнан келсәр бичкдүд зангарн әдл биш. Тиим болв гэдн нег негндән йир дурта, нег негндән дангин дөн нөкд болна.

Герин эзн Эрдюш Барбаевич болн энүнә авальн Жанна хоюрн олн үртә өрк бүлд өссн боссн улс болжана. Олн үртә өрк бүлд өссх йир амр болна. Эгчнр, ахнр-дүүнрәрн бидн олн, нәр байр болхла элгн садарн гер дүүрнә.

Бидн бичкдүдән бас иим кевәр бәәтн гиж дасхнавидн. Байр зовлнгиг әдләр хувалцтн гиж дангин сүв селвгән өгнәвидн гиж Эцк Эрдюш Барбаевич маднд келв.

90 жилмүдин күнд цагиг эдн хамдан нег негән дөннәд дааж һарв. Өрүн асхн Малан орулх, өвс өгх, услх мана бичкдүд дангин нөкд болна. Үсән тосан өндгән хулдж авхш, гертән малан бәрәд тежәл болна.

Үлдчн селәнә муниципальн әнгин ах специалист Людмила Хавалован келсәр Манджиевихнә көвүд күүкд йир сән. Дангин хамдан йовда әмтнлә мендләд дөн нөкд чигн күргж чадна.

Үлдчнә селәнә школын директор Арабган Зоян келсәр школын бәәдл жирһлд эдн өрк бүләрн дангин орлцна. Спортивн, ду бииһин марһаст эдн дангин нүүрлгч ормс эзлнә. Эк эцк эднд сән сурһмж өгнә, үлгүр болна.

Эндр өдр һурвнь ик сурһульд сурһуль сурч йовна. Оютнр Әрәсән чинртә кесг марһаст орлцад күндлһнә һашгудар ачлсн билә — эк эцкнрән дангин байрулж йовна.

Әрәсн чинртә марһаст орлцсн саамд бидн кесг үр иньгүдтә болвидн. Эндр өдр эднлә үүрлж йовнавидн. Цааранднь чигн эк эцкнрән байрлхар сана зүүжәнәвидн.

Эндр өдр олн үр асрсн эк эцкнр ямаран саната бәәхинь бидн днәс сурувидн? Эндр өдр мана бичкдүд сән жирһл эдлж йовтха. Жанна Макисмовна олн жилдән бичкдүдин садт көдлж йовна тегәд цуг бичкдүдт гемм зовлнг угһар бәәтхә гиж дурджана. Сүл цагт эн садын ахлач болад көдлж йовна.

Өрк бүлд цуһар ни негн бәәхлә, нег негән дөннхлә өрк бүлин чинр уралан девшхнь маһд уга.

Чуучән Валентина, Котина Валерий