Эн намрар темсн болн зер-земш зөвәр үнтәрв

Октябрь сар төгсж йовна. Ода әмтн үвлд хот хол белдж авчана. Болв эн жил урһаж авсн урһц хотл балһсна улсиг байрлулжахш. Иим кемд темснә болн зер-земшин үн кимдрдг бәәсмн. Ода болхла иим продукц үнтәржәнә.

Элст балһсна бәәрн күүкд күн Людмила Пихурова жил болһн үвлин өмн өргнд тәрә-темс белдж авна. Олн-зүсн темс давслад, үвлин кемд белдж авна, тер тоод боднцг болн мәнгрс хулдж авна. Энүнә келсәр, эн жилин намрар кергтә хот-хоолын үн кесг холванд үнтәрв.

Людмила Пихурован келсәр, темсн болн зер-земш икәр үнтәрв. Помидор тәвн арслнг, хаяр зун арлснг күрчәнә. Эннь эгл улст дегд үнтә. Боднцг бас үнтәрв. Арвн нәәмн — хөрн арслнг күрнә. Үвлд белдж авхд дегд дала мөнгн кергтә.

Тенгрин бәәдлин таал му болад темсн болн зер-земш үнтәрв гиж хулдачнр келнә. Әрәсән зәрм регионмудт темснә урһц темдглснәс му болв.

Рафик Абасовин келсәр, Воронеж, Тамбовск областьд жиннүлв. Тенд хур оржана. Боднцг хураж авч болжахш. Тегәд үнтәрх зөвтә. Астраханск боднцг йириндән үнтә. Эн жил бас үнтхрх. Боднцгин урһциг цугинь хураж авсн уга.

Жания Джанахова кесг жилдән тәрә-темс хулджана. Энүнә келсәр, элвгәр орсн хур темснә урһцд му нилчән күргв. Тер тоод боднцгин, хавстан болн улна луувнгин үн кесг холванд өсжәнә.

Хулдач Жания Джанахован келсәр, тенгин таал му болв. Үвлдән боднцг һучн тавн арслнг күрх бәәдлтә.

Элст балһсна цутхлнгд темсн болн зер-земш базрин үнәс зөвәр ик. Хулдачнрин келссәр, эн жил темсчнр эврәннь продукцин үниг өөдлүлж хулджана. Тегәд хулд-гүүлгән үн энүнәс ик болна.

Хулдач Людмила Кузнецован келсәр, тәрәчнр дегд үнтәһәр хулдна. Тегәд хулдачнр бас эврәннь немлт кенә. Ода хулдачнр баһар ирдг болв. Әмт күләжәнә.

Тер саамд Роспотребнадзорин көдләчнрин темдглсәр, коммерческ цутхлнгин аһуд санитарн зокал эвдгджәнә. Энүнд хот-хол хулддг кергтә таал бүрдәгдж уга.

Роспотребнадзорин әнгин ахлачин дарук Элина Бродская келсәр, хойр минһн доладгч жиләс авн цутхлнг хазгудын рынок көдлдгән уурв, энүнә ормж коммерческ цутхлнг секгдв. Эдн санитарн болн ветеринарн зокал күцәшгон төләд иим цутхлнг секгдв. Энүнд хулдачнр санитарн цаасн угаһар, шишлнг хувцн угаһар көдлжәнә. Цутхлнгд темс хадһлдг һазр уга, киитрүл бас ховр.

Темсн болн зер-земш күүнд олз-туста болдгинь цуһар меднә. Энүнд күүнд туста олн витамин болн минерал бәәнә. Негдвәр, намрин кемд темсн болн зер-земш хамгин олз-туста болна. Хойрдвар, иим олз-туста продукциг үвлин кемд белдж авч болх.

Баира Петрова, Бадмаран Владислав