Элстин хаалһс му бәәдлд тусв

Жил болһн Элстин хаалһд ясврин көдлмш кесн бийнь, хотл балһсна хаалһс му бәәдлд тусв. Элст балһсна уульнцар йовад мана үүдәгч баг энүнд ил герч болв. Ясврин хөөн хаалһс хур-цасн орхла дарунь эвдрж одна. Эн жил хотл балһсна уульцнин хаалһс яслһна төлә зурһан сай арслнг йилһж өггдх. Специалистнрин келсәр, иим мөнгн дегд баһ болжана. Балһсна хаалһс шинрүлж ясхин төлә жирн-далн сай арслнг кергтә болна. Иим мөнгн хотл балһсна хазнд уга. Мана үүдәгч баг эн төрәр автомобильмудын эздүдин болн хотл балһсна эдл-ахун элчнрин ухан-тоолвр сонсв.

Урдк жилмүдлә әдл цасн хәәлхлә, асфальтированн хаалһд нүкн һарч ирв. Эн саамд мана үүдәгч баг маршрутан Кировин болн Байдуковин енртә уульнцин ниилврәс авн эклв. Эннь хотл балһсна цутхлнгас дегд хол биш. Эн хаалһд автомобильмуд нег-негән дахад нүкнд унсинь үзвидн. Чернышевскийн, Демьяновская, Буденна болн Веткалован нертә уульнцар йовхд дегд әәмшгтә болв. Иим му хаалһар нүкәр өдр болһн хотл балһсна һардачнр көдлмшин кергәр церглтин машиһарн йовна. Эдниг шишлнг жолач зөөнә. Эздүд болхла иим му хапалһар йовад, машиһан хамхла, эврәннь мөнгәр ясх кергтә болна.

Эн залу күүнә келсәр, өдр болһн хөр-һуч дәкж эн хаалһар йовна. Бичкдүдән зөөнә. Энд хаалһ дегд му. Иим хаалһар йовж болхш. Эргәд йовхд хол болна. Һурвн сар хооран машиһан ясж. Арвн-арвн тавн минһн арслнг һарна. Яһж иим хаалһар йовхнь медгджәхш. Хаалһ эвдрәд, әәмшгтә болв гиж эн залу күн келнә.

Светлана Очаеван келсәр, нертә орсин бичәчин нертә уульнцд арвн һурвн жилдән бәәршлжәнә. Гермүдин өөр урһа модд суулһгдв, гермүдин эргндк аһуг эздүд цеврлж ахулна. Зуг хаалһин нүкн уульцнин бәәдлин муурулжана. Күүкд күүнә келсәр, уульнцин хаалһар машид нүкнд унад йовжахинь өдр болһн үзнә. Нег дәкж энүнд зеткртә йодвл учрсинь үзв.

Светлана Очаеван келсәр, баһчуд машиһар дегд түргәр гүүлгнә. Энд әәмшгтә хаалһ. Жил болһн ясвр кенә, зуг хаалһ хәрү иим му бәәдл һарч одна. Тенгрин бәәдл сольхла, хур-цасн орхла хәләтн иим бәәдл һарч одна. Эннь балһсн гиж келж болхий?

Элст балһсна эдл-ахун специалистнрин келсәр, ода хотл балһсна зәрм хаалһсар йовхд әәмшгтә болж одв. Жил ирвәс хаалһин нүкн гүн болад, икдәд йовна. Өдгә цагт хаалһс хотл балһсна захд биш, нам цутхлнг уульнцд му бәәдлд тусв. Хаалһин ясвр кехин төлә йилһж өгсн зурһан сай арслнг мөнгн хамгин түрүнд Ленина болн Осипенко нертә уульнцин хаалһс яслһнд йовулгдх. Урдк жилмүдлә әдл хуучн хаалһин нүкиг ясх арһ бәәнә. Тер саамд Элст балһсна хаалһин найн процентнь хуучрад, эдлврин болзгнь давж одв. Келхд, иим бәәдлин тускар хаалһин көдләчнр цөн жил бас иигж келсн билә.

Элст балһсна эдл-ахун участкин ахлач Василий Шараповин келсәр, зурһан сай арлснг зуг материал хулдж авхд күрх. Ода марһа зарлад, материал теткх организац шүүж авчана. Хотл балһсна эдл-аху эврән тосхлт кеж чадна, ясврин көдлмш эврән күцәнә.

Хаалһин нүкиг шинрүлж ясж болх, зуг энүнә төлә дала мөнгн кергтә. Келхд, хотл балһсна хаалһс шинүрлж ясхин төлә жил болһн жирн-найн сай арслнг кергтә. Специалистнрин келсәр, федеральн халхас дөн угаһар бәәрн хазнар иим ик көдлмш күцәдг арһ уга. Жолачнрин келсәр, мөнг уга гиж хотл балһсна һардачнр жил болһн келнә. Болв эздүд му хаалһар йовад, машиһан хамхлад, ясврин төлә дала мөнг һарһжахнь Элстин һардачнриг үүмүлжәхш.

Ээнән Ольга, Ирчин Алексей