Элст балһснд Үстин района мини-футбольн марһан болв
Үстин район Элст балһснд секәтә мини-футбольн марһа бүрдәж давулв. Энүнд района бәәрн улсас арвн команд тогтагдв. Дөрлдә давулх седвәр спортивн жиәсән ветеранмуд орулж өгсмн.
Үстин района элчнр хойр жил дарандан мини-футболльн секәтә марһа бүрдәж давулжана. Дөрлдәнә таалар командын ханьд зуг Үстин района элчнр орх хөвтә бәәсмн. Эдн ямаран чигн һазрт бәәсн бийнь марһанд орлцж чадх. Тер мет ямаран чигн наста улс дөрлдх арһта болв. Тегәд чигн Татал командын ханьд оют Руслан Карсаев наадв. Эн көвүн Татал селәнд өсж боссмн. Марһана тускар сосчкда, эврәннь һазра улсан дөннхәр шиидв.
Оют Руслан Карсаевин келсәр, района баһчуд диилвр бәрх саната. Энүнә төлә икәр көдлх кергтә. Олн марһанд орлцхла сән болх. Тиигхлә мана район цецгәрх. Футбол делгрлт авх. Энүнд икәр иткжәнә.
Марһанд ут-тоодан Үстин района селән болһна эчлнрин арвн команд дөрлдв. Эннь ут-турштан зун күн болн футболд дурта улс эдниг ирж дөннв. Элст балһснд бәәх Борис Чимидов эн өдр гертә сууж чадсн уга. Кесг жилдән Үстин районд бәәһәд көдлсмн. Энүнә тоолврар района Волга командыг дәкнәс сергәхж босхад, эн коллектив нерән туурулх зөвтә. Урдк жилмүд Үстин арйона команд танһчин хамгин сән команд гиж тоолгддг бәәсмн.
Борис Чимидовин келсәр, марһана шар кен диилвр бәсрнь ик чинр зүүжәхш. Хамгин һол кергнь — футбол сергәж босхж авлһн боджана. Урднь Үстин районд футбол сән делгрт авсн билә. Советин йосна цагт олн сән футболистнр танһчин болн района марһанд орлцдг бәәсмн. Ода селәнәс энүг босхж авх кергтә.
Марһаг спортд дурта улс болн района бәәдл-жирлһин тускар ухалжах әмтн бүрдәж давулв. Теднә дунд Эрдни Мучаев, Александр Нимгиров, Игорь Чимидов болн талдан чигн седвәрч улс йовна. Ветеранмудын тоолврар, районд баһчуд олра ирх көдләд, района социальн-экономическ делгрлтд эврә тәвцән орулх зөвтә. Физкультур болн спорт баһчудт цогц-махмудан батрулхд сән ничлән күргнә.
Харба поселкин элч Владимир Эрдниевин келсәр, района һардачнр Элст балһснд бәәсн Үстин района улсиг мартжахш гид эн марһан герчлжәнә. Эдниг мертлго, дөрлдәнд дуудж авла. Района футболыг өргх кергтә.
Цаһан Амна элч Олег Очировин келсәр, футболистнр сән наад үзүләд, дииләчән йилһж авхнь дурджана. Иим дөрлдән улсин хәрлцәнд туслна. Нег негән медәд, хоорндан ни-негн бәәх кергтә.
Бүрдәһәчнрт иим марһан йоста шүүвр болна. Энүнә ашар эдн хамгин сән футболистнриг йилһж авда, Үстин района футбольн команд бүрдәх саната. Иим таалд Волга команд дәкнәс нүүрт һарад, танһчин хамгин сән футбольн командын тоод орхнь лавта. Нег үлү, уд луга танһчин футбольн чемпионат эклх.
Чучян Валентина, Ирчин Алексей
