Элст балһснд Нарта-делкән билгтнр нертә үүдәчг седвәрин буйнч седклин санг концерт үзүлв
Элст балһснд Нарта-делкән билгтнр нертә үүдәчг седвәрин буйнч седклин санг концерт үзүлв. Хальмг танһчд хамгин сән гисн баритонмуд ирәд, Муслим Магомаевин дуулж йовсн үүдәврмүд олн улсин оньгт тусхав. Эн жил алдр дууч Магомаев дигтә далн нас зүүх бәәсмн.
Элст балһснд танһчин концертн залд хамгин сән гисн баритонмуд, нарта-делкән оперин билгтә дуучнр Давид Гвинианидзе, Сергей ПлюснИн болн Константин Бржинский нарта-делкән классическ үүдәврмүд, тер тоод Иоланта, Кармен, Севильский цирюльник опермудын, Летучая мышь болн Принцесса цирка нертә оперетмудын тасрхас дуулж өгв. Нарта-делкән билгтнр нертә сангин художественн һардач болн президент Давид Гвинианидзе келсәр, нааран хамгин сән баритонмуд ирв. Эдниг нарта-делкәд дуултн гиж үрвр кенә. Артистнр болн санг нарта-делкән классическ оперла олн улсиг таньлдулх зуратаһар көдлжәнә.
Мана орн-нутгин алдр дууч Муслим Магомаев урднь нарта-делкән цуг жанрмудын классическ үүдәврмүд, неаполитанск болн эстрадн дуд түрүн болж программдан орулж олн улсин чикнә хужһр ханһадг бәәсмн. Хойр минһн нәәмдгч жилд билгтә дууч сәәһән хәәхлә, Нарта-делкән билгтнр нертә санг тогтагдв. Энүнд Магомаевин дуулж йовсн үүдәврмүд орв. Эврә цагтан Муслим Магомаев иим программан цуг Әрәсәд, Украинд, Беларуссьт, Казахстанд болн талдан чигн орн-нутгудт одад үзлсн билә. Нарта делкән билгтнр нертә сангин ах концертмейстер Владимир Родионовин келсәр, иим программиг Муслим Магомаев эврән шүүж авдг бәәсмн.
Тегәд концертд иим үүдәврмүд олна оньгт тусхагдв. Нег үлү Магомаев неаполитанск болн эстрадн дуд йир сәәнәр дуулдг билә. Иим г#1199;үдәврүмдин кесг әмтн сонсхдан дурта. Әрәсән ик академическ государственн театрин дууч Сергей Плюснина келсәр, Муслим Магомаевла әдл баритонар һурвн дууч дуулна. Иим дуд дуулжахдан ик бахмжта бәәнәв, иим үүдәврмүд йир таасгдна гиж Плюснин келнә.
Нарта-делкән опермудын нертә театрмудын хамгин сән гисн дуучнр Хальмг танһчин улсин зүрк авлв. Элстин хөөн эдн Ростовск областьд гастролян царандан кех.
Арстана Светлана, Бадмаран Владислав
