Элст балһснд канализационн болн усна колектормуд әмтнд әәмшг учражана
Одахн Брянск балһснд болсн аюл кесг әмт үүмүлв. Эн туст мана танһчд бас бәәдл сән биш. Элст балһснд канализационн болн водопроводн колектормуд ямаран бәәдлд бәәнә?
Элст балһснд канализационн люкмудт әмтн унад, зәрмнь шав авснас көлтә өнгрнә, талдан унсн әмтн күндәр шавтна. Иим зәнг соннсн улс иткхш. Болв эн төр ода хурц төрт хүврв. Эврәннь герин өөр бәәх люкмудыг әмтн меддг болхла, талдан һазрт одсн улс иим люкмуд альд бәәхин медхш. Нег үлү, асфальтн хаалһд бас нүкн ик әәмшг учражана. Танһчин больницин эмч Валерий Манджиевин келсәр, нег залу күн харнһу сө гертән хәрж йовад, люкд унж. Күнд шав авад больницд орулгдв. Энүнә геснь, һар көлнь хамхрж, дотр цустаһар больницд орулгдв.
Иим шавстн улсин то күн тоолхш. Болв Манджиевин келсәр, иим кевәр олн улс больницд орулгдна. Ода деерән энүнәс көлтә өнгрсн күн уга. Тер бийнь эн төр йир хурц төрт хүврв. Элст балһсна һучн негдгч тойгта бичкдүдин садын күүкдин эк-эцкнриг болн хам-хоша бәәх улсиг икәр үүмүлжәнә. Татьяна Эрдниева һурвн ачта. Эн күүкд күүнә келсәр, люк эднә герин ард бәәв чигн, бичкдүд тер һазрт күрч чадх. Бичкдүд биш, бөдүн улс чигн энүнд унх әәмшг бәәнә. Татьяна Эрдниеван келсәр, әмтн көдлмшин хөөн ора хәрж ирнә. Люкмуд секәтә әмтн унх әәмшг бәәнә. Энүг хаах кергтә.
Тер мет иим худгуд талдан чигн әәмшг учражана. Иим люкмудт үвлин кемд гер-мал уга улс хонна. Виктор Демьяновин келсәр, иим һазрт иим әмтн хурна. Эдн әрк ууһад, хонна. Бичкдүдин садын һардач хотл балһсна ахлачнрт кесгт дәкж одла. Ода эн төриг яһж хаһлхинь медгджәхш.
Горводоканалын көдләчнрин цәәлһсәр, канализационн болн водопроводн худгудыг жил болһн ясна. Тер мет залврин компаня көдләчнр өдр болһн гилтә иим әәмшгтә һазриг эргж хәләнә. Болв иим көдлмшин аш үзгдхш. Энүнә учрнь бас медгдхш. Горводоканалын көдләч Вадим Манджиевин келсәр, иим люкмуд хулха авна. Ода полимерн болн бетонн люкмүд тәвжәнәвидн. Болв ода бетонн люкмуд хулхалдг болв.
Асфальтн хаалһд иим нүкн бәәснь — әмтн люк хулдад, мөнг кежәнә. Ода иим төмр хулдхла, нег килограммд нәәмн арслнг өгчәнә. Тегәд иим нег люк хулдад, зун һучн арслнг хоршаж болх.
Азыда Надежда, Бадмаран Владислав
