Элст балһснд елкс болн харһа модн олар хулдгджана
Шин жилин байр күртл арвн хонг үлдсн бийнь елкс болн харһа модн олар хулдгджана. Тегәд гертән байрин өдрмүдт елк хулдж авад кеерүлх цаг ода чигн бәәнә.
Базрт елк хулджасинь үзчкәд, шин жилин темдг болгч кеерүл хулдж авхар Александра Крылова шиидв. Эн саамд ик ке-сәәхн харһар мод хулдж авх санан орв. Шин жилин байр өөрдж йовхд иим хулд байр үүдәх гиж күүкд күн санв. Болв хамгин түрүнд ачнр-зеенрән байрулхар шиидв. Шин жилин байрин өмн өргнд елкин кеерүл һарһж авад, хар мод кеерүлх кергтә болжана. Александра Крылован келсәр, шин жилин байрин өдр күртл цөн өдр үлдв. Тегәд елк хулдж авхар седжәнә. Энүг угаһар байр тосж болхш, мана өрк-бүлд оньдин елк кеерүлгднә. Нег үлү, бидн йосн елк хулдж авнавидн гиж Крылова келнә.
Элст балһснд иим ке-сәәхн елк болн хар мод ик хол һазрас авч ирж. Эн жил энүг Пенза, Ульяновск, Самара, Тула балһсдас авч ирж хулджана. Өдгә цагт харһа бол елкин нег метрнь һурвн зун арслнгар хулдгджана. Александр Муняновин келсәр, хар мод хойр жил дарандан авч ирж хулджанавидн. Бичкн елк һурвн зун арслнг күрнә, энүнәс үнтә бас бәәнә. Ик елк үнтә болжана.
Эн өдрт Элст балһсна мэрийн шиидврәр, елк болн харһа мод хулдх шишлнг һазр йилһж өггдв. Хотл балһсна шишлнг эдл-ахун директорин дарук Александр Ванькаевин келсәр, ода деерән елк болн харһа мод хулджах арһлачнр дунд зака эвдсн йовдлмуд илткгдәд уга. Энүнә келсәр, эн жилин ноябрь сард батлж авсн шиидврәр, елкиг шишлнг һазрт хулдж болх. Ут-тоодан Элст балһснд иим арвн негн бәәрн бәәнә. Елк хулджах арһлачнниг бүрткх санатавидн. Хулд-гүүлгәнә зака эдн яһж күцәжәхин хәләхвидн.
Ода шин жилин кеерүл болгч елкиг болн харһа модыг Элст балһснд негдгч, дөрвдгч микрорайодын базрин талвнгд, Горькийн болн Чернышевскийн нертә уульнцсд хулдж авч болх. Тер мет елкс нәәмдгч микрорайона мини-рынкд, зурһадгч болн һурвдчг микрорайодын базрин өөр хулдгджана. Декабрин һучн негнд бас иим кеерүл хулдж авх арһ учрх. Зуг энүнә үн өсхм. Тегәд кезә елк гертә хулдж авхин тускар тадн эврән ухалх зөвтәт.
Санкун Кермн, Дукмана Николай
