Элст балһснд дула өглһнә кем эрт эклв. Зуг зәрм гермүдт ода күртл киитн
Хальмг танһчд дула өглһнә кем болзгаснь эрт эклв. Элст балһсна һардачнрин иткүлсәр, олн давхрта цуг гермүдт дулан өггджәнә. Болв Элст балһсна Мартын Нәәмн нертә уульнцин жирн хойрдгч герин патьрмудт ода күртл киитн. Иим бәәдлин учрнь ямаран? Залврин компаня ахлачнр иим йовдлын тускар ямаран цәәлһвр өгв? Энүнә тускар тодрхаһар мана сюжетд келгджәнә.
Раиса Ивановна Манаганова негдгч багин инвалид. Ода гертән әрә гиж йовжана. Көл-һарнь өвдәд, ки давхцад ик зовлнг учражана. Нег үлү киитн болхла йир күнд болна. Кесг өдртән медәтә күүкд күн Жанһр нертә ниицәнә слесарьмудыг болн сантехникүдиг дуудж авч чаджахш. Телефоһар жиннүлхлә, күн хәрү өгхш. Хәләтн, күн хәрү өгчәхш гиж Раиса Ивановна келнә.
Элстин негдгч микрорайона болн Мартын нәәмн нертә уульнцин гермүдт коммнуальн туслмж күргжәх Жанжр нертә ЖЭУ нерән сольсн бийнь, тер кеәвр мууһр көдлжәнә. Раиса Манагаровла хам-хоша бәәх Алла Шаповалова бас күүндврт орлцв. Эднә герт ода күртл дулан ирәд уга. Тегәд эврән подвал хәләхәр седв. Болв тенд герл уга харнһу бәәж. Гермүдин подвалыг залврин компань хәләж ясх зөвтә. Алла Васильевна келсәр, жил болһн залврин компаня көдләчнр турваһас кииһинь эврән һаһртн гиж келнә. Тавдгч давхрт бәәх әмтн иим көдлмш кесн бийнь, дулан ирсн уга. Мартын нәәмн нертә уульнцин жирн хойрдгч герин бәәрн күүкд күн Алла Шаповалован келсәр, сар болһн герин мөнг өгнәвидн. Мана мөнгн альдаран оддв, эннь медгджәхш. Коммунальн туслжм кедг көдләчнр көдлмшән мууһар кежәнә.
Раиса Ивановна Манагарова сар болһн герин болн коммунальн туслмжин мөнгиг цаглань өгнә. Иим кевәр мөнгән өгдг улс Элст балһснд дала. Жанһр нертә ниицәнә һардач Игорь Гейко мана үүдәгч баг ирсн кемд көдлмштән уга бәәж. Тегәд арһ уга телефоһар жиннүлх кергтә болв. Энүнә келсәр, жирн хорйдгч герин өрәлд дулан өггдв, талдан өрәлднь дулан өггдәд уга. Юнгад гихлә, тавдгч давхрт бәәх улс шин дула өгдг систем тәвәд, ки һарһг вентиль тәвж уга. Тегәд халун усн күрчәхш. Залврин компаня ахлач Игорь Гейко келсәр, эндр Мартын нәәмн нертә уульнцин жирн хорйдгч герт дулан өггдх. Нәәмдгч микрорайона арвн нәәмдгч герит улст эдн ямаран үг келх. Энд бәәх улс кесг өдртән даарчана. Кезә дулан өггдхнь медгджәхш.
Колдан Наталья, Очра Сергей
