Элст балһсна олн халхта гимназин сурһульчнр буйнч седклтә керг үүлдвр бүрдәв

«Күн дөнгәр — шовун далваһар» гиж хальмг улсин үлгүрт келгднә. Элст балһсна олн халхта гимназин сурһульчнр буйнч керг үүлдвр бүрдәһәд эрмдгтә бичкдүдин интернатд бәәх көвүд -күүкдт дөнгән күргв.

Эн харһлт хойр дам байрта болв. Орс улсин Масленица байрин өдрмүдт яаарм бүрдәһәд, ямтәхн хот хоолан, һарарн кесн кегдлмүдән хулдад хоршаж авсн мөнгәрн урн һарин кичәлд кергтә цуг тоотс хулж авб.Эн буйнч седклтә керг үүлдврт олн жилдән бат заллһлда бәрж йовсн спонсормуд эврә дөнгән бас күргв. Школын сурһульчнр интернатын директорт Электрокардиограф болн физиотерапевтическ кабинетд терапевтическ лазер белгллв.Артеменко Лазарю болхла сотов телефон белглв, тер юнгад гихлә эн көвүн бичкдүдән хәләһәд, сүв селвг өгәд, сурһмжлачнрт дангин дөн нөкдән күргнә.

Олн халхта гимназин сурһульчнрин келсәр эн таньлдһн “Я — гражданин России» гидг керг үүлдврәс эклв. Тер өдрәс авн эдн хоорандан үүрлддг болв. Сурһульчнрин келсәр, Элст балһснд тиим интернат бәәсинь медсн уга билә, тегәд цааранднь эн бичкдүдлә үүрләд дөн болхар зүткжәнә.

Олн халхла гимназин сурһульчнр интернатын көвүд күүкдлә театрт, музейд, концертд одв. Эрмдгтә бичкдүдт эн соньн керг үүлдвр ийр таасгдв, эдн мана хальмгин нертә артистнриг дураһад би биилж дү чигн дуулж өгв.

Өдр дуусн интернатд суужах көвүд күүкд эрүл менд бәәсн көвүд күүкдлә әдл дала юмн үзж чадхш. Эднә төлә бүрдәсн керг үүлдвр эднә уханд кесгтән мартгшго гиж эн буйнч седклин керг үүлдвр бүрдәсн школын багш Джукана Данара келв. Иим бичкдүдт дангин дөн күргхлә эдн эврәннь күнд гемән невчкн мартх.

Күн болһн иим бичкдүдт дөн нөкдән күргж чаджана, хамгин түрүнд эднд әмтнә бүлән хәләц, бүлән үг кергтә болжна.

Чучян Валентина, Жамбинов Дмитрий