Элст балһсна 12-гч тойгта школын сурһульчнр “Локобаскет” турнирт диилвр бәрв

Элст балһсна 12-гч тойгта школын сурһульчнр танһчин баскетбольн турнирт диилвр бәрв. Дөрлдәнд ах классмудын сурһульчнр орлцв. “Локобаскет” нертә марһаг Әрәсән Өмн үзгт бәәх регионмуд РЖД бүрдәв. Хальмг Танһчд эн турнир һурвн жил дарандан давулгджана. Ода түрүн болж танһчин лигин дииләч сольгдв. Эн команд Краснодар балһснд болх марһанд танһчин нерән харсхмн.

Бичкдүдин спортын школын ул деер тогтсн авьясар товчлгч марһан болв. Баскетбол делгрүлжәх ор һанцхн спортын ниицән болжана. Нег үлү, эн спортын мөнгнә һаруһинь әрәсән төмр хаалһ даажана. Танһчин райодт болн балһснд диилвр бәрсн 24 команд товлчлгч марһанд орлцх зөв авв. Аштнь һурдвгч ормд һархин төлә Баһ дөрвдә гимназин болн Лаганя района Северный нертә поселин школын элчнр дөрлдв. Наадна йовудт цүүгән чигн , шав авх саам чигн учрв. Аштнь Баһ Дөрвдәхн нег очко үлү хоршаһад Лаганя баскетболистнриг шүүж авв.

“Локобаскет” турнирт орлцлһн сән дамшлт өгсн деерән Хальмгт баскетбол делгрүлһнд сән нилчән күргнә.

Тренер Хаалһ Санджиевин келсәр, эн марһанд орлцхин төлә күүкд-көвүд өдр-сө уга баскетбол наадж сән белдвр кев.

Эн марһана спонсор Әрәсән төмр хаалһ Локобаскетин цуг орлцачнрт шишлн хувц-хунр белглв. тегәд танһчин школын икнкнь спортын формар теткгдв. Призермуд болхла, меечг, дорва болн нань чигн тоот бәрүлж өггдв.

Эн турнирин күцәгч директор Андрей Пахудкон келсәр, эн жил марһанд 24 школ орлцв. Ирх жилд энүнә то икдхлә, сән йовдл болжана.

РЖД школьн лигин турнир цуг әрәсән чинр зүүв. Тегәд Краснодарт май сарла болх товлгч финалын ашар йилһән сән командд энүнд ирлцәтә чинр зүүгдхмн. Тер мет бүрдәһәчнр жил болһн дииләчнрт һол мөрә бәрүлж өгнә. Урднь Европин кубок шүүж авхин төлә Кипрт йовх саам учрсмн. Дәкәд болхла, Литва болн Турц орн-нутгт спортсменмүд йовсн билә. Региональн девснгд диилвр бәрсн 12гч тойгта школын баскетболистнр Абхазин болн Өмн үзгин болн Ар үзгин федеральн округин хоорнд болх марһанд сән үзмж бәрх саната.

12-гч школын 10-гч классин сурһульч Босхмж Адучиевин келсәр, тенд сән дамшлтта баскетболистнрла харһлт кех саам учрх. Тегәд энүнд сән белдвр кех санатавидн.

ДЮСШ-ан директор Геннадий Левиновин темдглсәр, мана танһчд шишлн школ уга болсн йовдл һундлта. Краснодарт болх марһанд шишлн школмудт белдвр кедг баскетболистнр орлцхмн.

Тиим болв чигн иим чинртә турнирт орлцлһн баскетбол экләд нааджах көвүд-күүкд сән урмд өгх. Цуг документац болн эрлһ эрдм-сурһулин министерств белджәнә. Тегәд үйн наста баскетболистнрин халхас сән наад үзүлж диилвр бәрх неквр тәвгджәнә. Тегәд школьная лига Локомотив эн сән керг-үүлдвриг делгрүлж олнд күргж медүлхлә, мана хальмг танһчд чигн нертә спортменмүд өскж чаджана.

Гүзәлән Татьяна, Бадмаран Владислав