Экологин специалистнр бичкдүдлә харһлт кев
Төрскн һазр-усан дурлж, эргндк йиртмж хардг сурһмж авчана. Иим төрәр хальмгин экологуд Целинн района Сайгачонок лагерь амрчах көвүд-күүкдлә соньн күүндвр кев. Экологическ сурһмж өглһнә көдлмшин программар йиртмж харлһан министерствин көдләчнр иим харһлт бүрдәж давулв.
Төрскн һазрин йиртмж өвәрц болн ке-сәәхн. Тер мет энүнд бәәх усна боодгуд, мал-аһрусн болг шовуд йир соньн. Йиртмжин көрнгин министерствин көдләчнр энүг харсж харлһан тускар бичкдүдт келж өгв. Эргндк йиртмжин специалистнрин тоолврар, хамгин һол төрнь — күн йиртмдин нег хүвнь болсн бийнь йиртмжд му үлмәһән күргж, бузрджана. Эн ухан-санаг бичкдүд болһнд күргж медүлх кергтә. Тегәд өдгә цагт сурһульчнрт экологин халхар эрдм-сурһуль өглһнә төр хурц төрт хүвржәнә.
Йиртмжд дуран өглһн хоосн энүг дуран өгч хәләсн деерән, энүг харсж харх кергтә болжана. Эннь темтаическ хургин һол төр болв. Энүнд нурһлж бичкдүд орлцсн учрас эднд эгл келәр энүнә тускар цәәлһж келж өгх төр тәвгдв. Министерствин ах специалист Намина Болдаеван келсәр, бичкн көвүд-күүкдт экологическ сойлын ул тогтах кергтә.
Йиртмжин көрнгин министерствин специалист Намина Болдаеван келсәр, экологическ төрмүдт нерәдгдсн керг-үүлдврт орлцсн бичкдүд эргндк йиртмжиг әрүн кеәвр хадһлх ухан серл орна. Экологин төр ик чинртә төр. Энүнд эргндк йиртмж харлһна, йиртмжин көрнг эзни кевәр олзлһна төрмүд орна.
Арвн негн наста Барха көвүн эн харһлтас кесг соньн болн олз-туста ухан сана авч һарв. Үлгүрнь. Хальмг танһчин аһуд региоанльн чинртәх йинс заказник болн йисн йиртмжин бумб бәәхин утскар медж авв. Хакльмг танһчин аһуд бәәршлдг Улан дегтрт орулж бичгдсн шовудын зургуд түгәж өгәд, эднә тускар көвүд-күүкдт келж өгв. Эн көвүнә келсәр, Үстин районд хорта моһа бәәдгин тускар медж авч. Энүнә келсәр, мана танһчин аһуд кирстә аралжн бәәхин тускар медж авхар седв. Иим аралжн бәәнә. Эдн хортаһар кү зууна. Усна боодгин өөр һал шатахмн биш. Хальмгт теегин гөрәсн бәәнә. Эдниг алх керг уга.
Эргндк йиртмж харлһна жилин программар төрскн һазрин өвәрц йиртмж харслһна тускар олн-зүсн керг-үүлдврмүд бүрдәж давулгдх. Йиртмж харсж харлһна тускар экологуд эврән бичкдүдт үлгүр үзүлв.
Ээнән Делгр, Хавтхна Анатолий
