ЕГЭ-н шүүврин аш диглгдв
Шүүврин кем төгсв. Ода школан төгсәсн баһчуд аттестатан авчкад, деед сурһульд орхар документан өгчәнә. ЕГЭ-н шүүврин ашин тускар танһчин толһач Алексей Орловла болсн харһлтд келгдв. Энүнд эрдм-сурһулин министр Лариса Васильева, энүнә дарук Ирина Кавкишева болн ЕГЭ-н шүүвр бүртклһнә олна комиссин ахлач, ГТРК “Калмыкия” филиалын директор Михаил Ткачев орлцв.
Эн жил танһчин хойр дундур минһн сурһульч болн урдк жилмүдт школан төгсәсн тавн зун көвүн-күүкн ЕГЭ-н государственн шүүвр өгв. Эн дааврта керг күцәхин төлә танһчин эрдм-сурһулин, сойлын болн номин министерств цуг кергтә керг-үүлдврмүд күцәв. ЕГЭ-н шүүвр өгх бичкдүдт болн эднә эк-эцкнрт цәәлһврин көдлмш бүрдәгдв, шүүвр өгх бәәрн белдгдв, ут-тоодан һучн иим һазр темдглж авгдв, комиссьмүд тогтагдв. Тер тоод государтвенн шүүврин, предмтен болн конфликтн комиссь көдлв. ЕГЭ-н шүүврт көдлх специалистнрин сурһльд онц оньг тусхагдв. Эднә зәрмнь Элст балһснд мергжлтән өөдлүлһнә институтд сурв. предметн комиссьмүдин ахалчнр Москва балсһна эрдм-сурһулин секәтә институтд дамшлт хоршав.
Танһчин эрдм-сурһулин, сойлын болн номин министрин дарук Ирина Кавкишеван келсәр, ЕГЭ-н шүүврт тохнята белдвр кегдв. Шинжләчнр сурһуль дасхар Москва балһснд одв. Тендәс ирчкәд, предметн комсиссин ахалчнр шинжләчнрлә дамшлтарн хувалцв. Тавн зун шинжләчнрәс шүүврт көдлх хойр зун найн дөрвн кү шүүж авч.
Шүүврин цуг девснгд бүртклһнә материалмуд авсн цагас авн сүл апелляц болсн күртл олна комиссь бүртклһ кев. Эн комиссь танһчин толюһачин зәрлгәр бүрдәгдв. Энүнә ханьд ЕГЭ-н шүүврин ашар эс соньмсжах олн-зүсн структурмудын элчнр орв.
ЕГЭ-н шүүвр бүртклһнә олна комиссин ахалч, ГТРК “Калмыкия” филиалын директор Михаил Ткачевин келсәр, комиссин гешүд һучн пунктас хөрн хйор пунктд одв. Олн-зүсн предметар бүртклһн кегдв. Комссин гешүд шүүврин цуг девснг шинжлж хәләв. Тер мет предметн комиссьмүдин сүүрт орлцв. Олна бүртклһнә күцл күцгдв гиж келж болх.
ЕГЭ-н шүүрвин ашин утскар келхлә, эн жил Хальмг танһчар цуг предметар дундын балл жирн хйор кемжәнд күрв. Келхд, эн жил хамгин бичкн кемжә авсн сурһульчнрин то баһрв. Англь келәр, биологин, химин, обшестовознание болн географин предметар найн негнәс үлү балл авсн улсин то ик болв. Тегәл федеральн прдемтен комиссь эднә көдлмшиг дәкәд нег бүрткж хәләв. Министрин дарук Ирина Кавкишеван келсәр, эн жил шүүврин көдлмшиг федеральн комиссь дәкнәс баһар бүрткж хәләв. Эдн шүүврин темдг өөдлүлхин эс гиж баһрулхин утскар шиидвр авв.
Бүртклһнә органмуд мана танһчд ЕГЭ-н шүүвр өгсн кемд зокал эвдсн дөрвн йовдл илткв. Тер тоод шүүврин материалмуд интернетд барлгдв. Энүг олзлсн сурһульчнр көдлмшин аш тоод авгдсн уга. Ода арвн юурвн предметар шүүврин аш диглгдв. Эрдм-сурһулин министерствин темдглсәр, эн жил шүүврин аш му биш болж һарв.
Елена Алексенко, Настан Сергей
