Дәәнә ветерана аваль эврәннь зөвән харсв
Төрскән харсгч дәәнә ветерана авль эврәннь зөвән харсж чадв. Сарпинск района Садовое селәнә бххрн күүкд күн Анна Грицаева зарһаин шиидврәр закаһар өггдх дөнцл мөнг авч чадх. Танһчин тосхлтын, көлгн-күчнә болн хаалһи эдл-ахун министерствин межведомственн комиссин шиидвр хажһр гисн шиидвр зарһ батлж авв. Танһчин толһач эн төриг эврәннь чанһ бүртклһнд авв. Түрүн инстанцин зарһин шиидврин нег өдрин эргцд күцәх даалһвр Алексей Орлов ирлцнһү министерствд өгв.
Давсн жилд төрскән харсгч дәәнә ветеран аваль Анна Грицаева танһчин тосхлтын, көлгн-күчнә болн хаалһин эдл-ахун министерствд одад, бәәдг гер хулдж авхин төлә дөнцл мөнг сурсн бәәж. Иим мөнгн Әрәсән закаһар өгх зөвтә бәәж. Болв энүнд иим дөнцл мөнг өгшго гиж эдн хәр үөгв. Анна Грицаевад тәвн негн дөрвлжн метр аһута патьр бәәнә гиж министерствд келв. Медәтә күүкд күүнә келсәр, ода эн хойр көвүтәһән тәвн һурвдгч жилд тосхсн хуучн герт бәәршлжәнә. Ода энүнә герт хур-чиг орхла дусал дусна. Медәтә күүкд күүнә эрүл-менднь му болв чигн, зарһд одад эврәннь зөвән харсхар шиидв. Энүнә тускар прокурор зарһд эрлһ орулж өгв. танһчин тосхлытн министерств зака эвдж күүкд күүнд дөнцл мөнг өгч уга гиж энүнд бичв. Эннь төсркән харсгч дәәнә ветерана авалин зөвинь эвджәнә гиж келгдв. Ода Грицаевихна бәәх патьр дегд бичкн болжана.
Хальмг танһчин прокурорин нөкд Данара Имкенован келсәр, Хальмг танһчин прокурорин эрлһиг Элст балһсна зарһ бүклднь ханһав. Энүнлә министерств зөвшәрлго, эрл орулж өгв. Эн жилин январин арвн дөрвнд Хальмг танһчин Деед зарһин гражданск кергүдин зарһин коллегий Элст балһсна зарһин шиидвриг тер кевтнь үлдәв.
Эн төриг Хальмг танһчин толһач Алексей Орлов эврәннь чанһ бүртклһнд авла. Ода энүнә тускар шиидвр батлж авгдв. Түрүн инстанцин зарһин шиидвриг эрк биш күцәх кергтә. Иим заквр Алексей Орлов правительствин ахалчин дарук Геннадий Бадиновд болн тосхлтын, көлгн-күчнә болн хаалһин эдл-ахун министр Кирил Ботовд кев. Орловин келсәр, гемтә улс засгла харһулгдх.
Танһчин толһач Алексей Орловин келсәр, межведомственн комиссин шиидвр хажһр. Әрәсән закаһар төрскән харсгч дәәнә ветеран авльд бәәдг гер хулдж авхин төлә дөнцл мөнг өгх зөвтә. Тосхлтын министр Кирилл Ботов чанһ засгла харһулгдв.
Анна Грицаевала учрсн йовдл ор һанцхн биш. Сарпинск районд зарһар дамжулад төрскән харсгч дәәнә ветеранмудын һурвн аваль закаһар өггдх дөнцл мөнг авч чадв.
Ээнән Ольга, Батан Санжирма, Хулхачин Николай
