Дуучнрин марһан цаарандан болжана

“Голос нации” нертә марһана хойрдгч девснгд байрта йовдл учрв. Тооцана концертин ашар нүүрт һарсн шин улс йилһрв. Марһанд орлцачнр “Легато” ансамблин программас дурлсн дууһан дуулж өгв.

Марһана шүүврин девснгин хөөн арвн һурвн хамгин сән гисн дуучнр йилһрв. Ода энүнд орлцачнр девснг болһнд тохнята белдвр кежәнә. “Легато” нертә багин көгжмчнр эднлә өдр болһн кесг частан көдлнә. Танһчин нертә багин көгжмчнрин келсәр, шинкн экләд көдлжәх артистнр цуг селвгүдиг болн некврмүдиг күцәж, сурһулин кемиг дутажхаш.

“Легато” нертә багин дууч Рустам Баджаевин келсәр, маднд эдн цуһар бичкн оддуд болж одв. Марһанд орлцачнр эстрадын халхар түрүн ишкдлән кежәнә. Иим марһана нилчәр баһчуд хальмгин сцен деер һарч чадх, иргчдән Әрәсән әмтнд билг-эрдмән үзүлж чадх нәәлвр бәәнә.

Марһанд орлцсн дуучнр дууһин эрдмән үзүлсн деерән, сцен деер бийән яһж бәрхинь болн дуулжах дууна учр-утхинь медүлх эрдм үзүлсмн. Эднә негнь Гернзл Батырева дуулсн дууһарн концертн залд туулин бәәдл тогтаж чадв. Энүнә үзүлсн “Таинственная” нертә композиц олн улст таасгдв. Болв ода деерән марһана нүүрт урдк кевәр Альбина Ибрагимова йовна. Марһана хойр өдрин ашт хамгин олн балл хоршаж чадв. Альбина Ибрагимован келсәр, мадн хойрдгч тооцана концерт үзүлвидн. Урднь һарһсн дуту-дундсан тоод авад, эдниг чиклж чадвидн. Ода хойрдгч концертд цуг дуту-дундсан чиклж авх арһ бәәнә.

Дөрлдәнә хойрдгч девснгд эн күүкн “Сон” гидг нертә ду белдв.

Марһан болжасн цагин эргцд эдн цуугтан хоорндан өөрхн таньлдад, нәәжнр болв. Ода эдн нег-негән дөннәд, түшг болжана. Көдлмшин хөөн хамдан амрна. Цаарандан дуучнр дәкәд нег девснгд орлцад, товчлгч девснгд орх улсиг үилһж авх. Марһана дииләч болн “Голос нации” нер кен зүүхнь апрелин чилгчәр медгдх.

Елена Алексенко, Настан Сергей